Jowai: Ha kani ka 8 tarik uni u bnai da pynman ya ka yalang paidbah yong ka NPP ha 1-Nartiang Constituency heiwa da sakhi ya i wan tooid da ki phaw hajar kiwa kyrchaan ya u Sniawbhalang Dhar kam u kyrtong ka party na kani ka Constituency wei ya kani ka yalang da wan sakhi leh da u National President ka Party u Conrad K Sangma, wa kiwi kiwi.
Ha chwa wow kut kani ka yalang da klam khaddooh da u Sniawbhalang heiwa da pynmih u yaki kyntien wa ong ‘lada em i duna ha i ja i doh i baam i dih, ki chynrang kiwa jooh dih wow dih ki dei kiad’ iwa da ktah yei sñiaw ki paidbah kiwa wan cha kani ka yalang, wei ini i jooh ki kyntien da pynpoor ya ki ha kylleiñ lyngba ki Social Media.
Hei yatoh wa ini neiliang u Sniawbhalang ynne ka sngi da pynche u deiwa ong “Ini waroh ymtoh iwa klam O na mynsien tangwa klam O wow pyn danda pyn wyrngia ya ki paidbah kiwa da chong ha kani ka yalang nadooh wa sdang ko”.
“Nga kam u rangbah kammon u klam O kam kini ki kyntien khlem pyrkhat na mynsien, lada ymtoh wa pyndanda hi-eh O ya ki paidbah” da pynrap u Sniawbhalang.
Chooh chooh da ong u wa lada em kiwa sñiawphær kiwa da takha ya kini ki kyntien oo, paan maap na uwi pa uwi wa kawi pa kawi kiwa em ha kani ka yalang kamjooh leh kiwi ki lok kiwa na ka Constituency wa na kiwi ki chnong.
Heijooh i por u Sniawbhalang da ong u wa lada mut u deiwi kiwi won daw chim ki deiwi khamtam ha kini ki por heiwa boon ki bru kiwa kwah u chim kabu yei klam uwon uwon u bru lada u kyrtong, uwa yahkhmat wot hadooh u bru paidbah uwa kyrchaan ya u kyrtong næ ka party.
Discussion about this post