Shillong: Ka yalang yong ka Pradesh Election Committee ka party Congress kawa da bichaar ya 90 tylli ki pyrtuid yong ki bru kiwa paan Ticket na ka party da pyntip wa daw pyntip noh ya ki pyrtuid ki kyrtong ha waroh ki 60 tylli ki Constituency ha kini ki kajiak sngi.
Hawa klam hadien wa wai ka yalang, u Montri Rangbah ka jylla, u Dr. Mukul Sangma da ong u wa nalor ki MLA ka Party kiwa paan ya ka Ticket da em leh kiwi ki MLA kiwa thmu wow psiah cha ka party kiwa paan Ticket na ka Congress wei ya kini dang chong bichaar ya ki.
Ha iwi tawon i liang, u Dr. Mukul da ong u wa ki phang krehkaam yong ka Congresss ha kani ka Election toh wow bichaar ya ki kaam wa ka sorkar da leh ko wei wow pyndep ya kiwa sahteiñ kamwa da kular.
Da ong u wa ha kini ki 5 snem ka Congress ka da synchaar deiwa pyrchang u kreh kamwa da kular ko neibynta ka jylla wei da wanrah ko leh yei chongsuk.
Chooh chooh da ong u wa ha kini ki san snem ka jylla da sakhi ko ya i chongsuk neibhah da ye ko u pynwiar ya ki kaam khang chnong kamjooh ki yakhih wa ktah ya ki paidbah khamtam kiwa sem chilliang kup chilliang.
Da ong chooh chooh u wa ka sorkar jylla da pyrchang ko nadooh u snem 2012 wow wanrah ya ka Mining Policy hachwa wa ka NGT khang ko ya i tih mooyong ha ka jylla, tangwa da chim por neidaw wa ka sorkar haap ko u bichaar bniah tot pa tot khnang wym ktah ko ya ki paidbah kiwa kreh ha ki kaam mooyong wei kamjooh leh haap pyrkhat ya ka rymaw.
U Dr. Mukul da beiñ u ya u MLA warim ka Pynthorumkhrah, u AL Hek deiwa ong wa i lai psiah u cha ka BJP toh wa kwah chuki u.
Da ong u wa i wan u cha ka Congress ha kitu ki por wa i uiñ biang u cha ka BJP ym du neibynta ka chuki wei em leh i yoh myntoi samen ha ka kamai (Business) yong oo deiwa lai pynyatoh u wa ki heh ka BJP ha Delhi.
Discussion about this post