Jowai: Ka sorkar India ynne ka sngi da chim ko ya ka rai wow pynku ya ka dan wa tip kam ka Custom Duty naka 15% cha ka 20% ya waroh ki Mobile Phone wa chna cha baar ka ri kiwa wanrah chapoh ka ri.
Ya ini da pynbna kam chibynta ka mang poisa namo ka Union Budget 2018 wa wanrah da u Montri ka tnat muna poisa ka ri u Arun Jaitely wei ini man ko kam wow pynchlur yei pynmih ya ki tiar ki tar wow chna Phone hapoh ka ri kawa man ka thong u Montri Rangbahdooh ka ri u Narendra Modi kawa tip kam ka “Make in India.”
Ini ye i u pynbor ya ki Company yow lait u syad dor ki Mobile Phone yong ki wow booh karkhana ki hapoh ka ri yow lait ki na kani ka Custom Duty.
Heijooh i por leh da pynku ya ka dan wa tip kam ka Import Duty hei yatoh wa ki Printed Circuit Board (PCB), ki tiar ki tar Camera kiwa pynemkaam hapoh ki Smartphone heiwa ki Company kam ka Xiaomi, Motorola, OnePlus wa kiwi kiwa pyndait donhi ya ki tiar yong ki ha India katwa ym em pynmih ki ya ki tiar ki tar napoh India wow chna noh hapoh ka ri.
Ka Company Apple ki phone yong ka daw ku dor chooh ki neidaw ka phah donhi ko ya mar chapoh ka ri kiwa da dep chna chwa.
Daw ku dor leh ya ki tiar (Spare Parts) ki phone heiwa boon ki por toh kiwa wan na baar ri.
Neiliang uwi na ki tre ka Micromax kawa man ka Company India u Rajesh Agarwal da pynsñiaw u yei sñiawkmen yeini wa leh ka sorkar neidaw wa daw pynchlur ko ya kiwi ki Company wow wai karkhana ki hapoh ka ri.
Discussion about this post