Jowai: Ka Ri-loom Jaiñtia man ko kawa da kyrkhu da ka rymaw heiwa da em ki thaw kiwa miat kiwa yoosuk kiwa pynchoh biej ya kiwa boon kiwa da riñ ya kiwa uiñke suwari na kylleiñ ka jylla wa ki ri ka pyrthai kam ka Nartiang, ka Shnongpdeng wa kiwi kiwi.
Kawi na ki chnong kawa da sdang wow ku ha kani ka kaam toh ka chnong Darrang kawa jngai kamwa 38 Km na Jowai wa 11 Km na Amlarem handlada i pynkhreh pura wow pdiang ya kiwa wan uiñke suwari dang lai i chaaid chaaid hadooh katni.
Hapoh kani ka chnong da em kawi ka yingkieñ jri kawa da pynwandur da ki thied dieñ.
Da em leh ki lieñ kiwa da booh kyrpang ya kiwa wan uiñke suwari u chong ki wei wow lai cha chilliang ka wah Mynngot wei na kani ka jooh hi ka thaw ye leh u chynna ya ka yingkieñ Dawki.
I miat kani ka thaw man i hadooh kattæ wada boon ki bru wa wan cha kani ka chnong wow chna film, wow riñ video wa kiwi kiwi.
Katkam wa man katni dang chna ya kawi ka Resort harood ka wah Mynngot wei da em leh ki yung trep wa ki tent kiwa ye u sahmiet chipor.
Ya ka kaam uiñke suwari hapoh kani ka chnong da pyllai da ka Darrang Tourism Promotion & Development Society (DTPDS) kawa da pyllai da ki khon khynroo khyllood ka chnong kamjooh leh wa ka Dorbar Chnong.
U Chairman ka DTPDS u Reachingson Kongwang da pyntip u wa katkam wa man katni hanlada ympu em u dep chna ya kiwa boon ki thaw wow krehkaam pura i pdiang ya kiwa uiñke suwari, kiwa uiñke leh wan bait ki khamtam ha ka Sngi Chohthat wa Bibar heiwa dap da ki bru wa wan uiñke deiwa ong leh iwa miat dooh u wanke cha ka chnong toh ha ki sngi poh yaaw wa duna bru.
Discussion about this post