Shillong: Ynne ka janmiet heipor kamwa 4 waje kawi ka kari Maxi wa ympu em Number da lai tyrrah ko naphang ha ka thaiñ Ïewmawlong heiwa 8 ngut ki bru da mynsoo joor ki.
Katkam ka khubor wa da yoh da pyntip wa katai ka kari toh kawa yah u Pynshailang Kharlyngdoh (24) wei da emlang u Bimol Chettri (24) kiwa da suba toh kiwa da muaid ha katai ka por wei ki pulit da rah ya ki cha thanat.
Kiwa da mynsoo ha ini i jia toh kiwa tip pyrtuid kam u Amar Chettri (45), u William Massih (35), ka Jenisha Lyngdoh (26), Riden Lyngwa (15), Angelsteve Mairom (14), Margareth Kharlukhi (32) wa u Denis Rani (25).
Napyrdi kiwa mynsoo, 2 ngut toh ki khynnah skur ka St. Dominic Savio HSS, Mawkhar wei ya kini waroh kiwa da mynsoo da pynkit noh cha Civil Hospital, Shillong yow yoh ki yei sumaar wa emkaam.
Discussion about this post