Shillong: Ka Nationalist Congress Party (NCP) da beiñ joor ko ya i chah tynyap u kyrtong ka party u Jonathone N Sangma ha ki damok ynnin i miet deiwa dawa wow takit da ka tnat CBI.
Hawa yaklam ya kiwa pathai khubor ynne ka sngi, u working president ka NCP Meghalaya u Vijay Rai da ong u wa i chah tynyap u kyrtong toh iwa yatoh wa ka election neibhah da kyrmen bha wow jop u ha kani ka kynti.
Da ong u wa ini waroh da leh da ki bru kiwa emkti wa ki seiñ saiñhima.
Da pyntip u wa u Jonathone ha u snem 2013 da wan u heiwa le hadien wa chah pynrem u ha ka kyrtong ka Congress ka Deborah Ch Marak.
Da pyntip u wa u Jonathone da chah maham u ha ki damok wei da ujor pyrchah u leh ya ka kyrtong ka Congress wa pynemkaam ko da ki damok ha kani ka kaam Election.
Da pynbaad u leh ya ki tnat pulit kiwa da kheiñ stiñ hanlada chah maham u.
Katkam wa ong u Vijay, da chimpor hadooh 4 kynta ya ki pulit wow poi cha kani ka thaw wa jia ini katwa u Montri Rangbah ka jylla, u Dr. Mukul Sangma dadep booh u ha Facebook hajrong ini iwa jia.
Da ong u wa ym ye u pynbaad yeiyi yeiyi heiyatoh wa ini tangwa ye hi-eh u ong wa kini ki damok da yoh yarap poisa ki lyngba ki seiñ saiñ pyrthai.
Discussion about this post