Shillong: Ka Indian National Congress (INC) ynne ka sngi da beiñ biang ko ya ki kaam baam-tooh ka sorkar BJP wow khroh biang ya ki paidbah ha kani ka Election.
Uwa ektien ya ka AICC uwa da wanpoi cha Shillong, u Randeep Singh Surjewala da beiñ u leh ya ka NPP wa man ko kam ka thaw rieh yong ka BJP wa ka RSS ha kani ka jylla.
U Randeep da ong u wa lada ki paidbah jied ki ya ka NPP ym yaphær i neibhah wa man kamwa jied ya ka BJP neibhah wa kini man ki kiwa yakrehlang.
Da pynbaad u wa u Conrad K Sangma wa ka NPP yoh poisa ki na ka BJP ha kani ka Election neibhah emlang ki hapoh ka North East Democratic Alliance (NEDA).
U Randeep da kob u ya u Conrad wa lada nood u namo ym nood wow ong wa ka BJP ym em kyrchaan poisa ko ya ka NPP, lada nood u wow ong wa ym chna sorkar u wa ka BJP lada jop ko hapoh kani ka jylla?
Da ong u wa hapoh i synchaar ka BJP ki Kristan chah lehbeiñ ki hapoh ka jylla Uttar Pradesh, Madhya Pradesh heiwa ki yungmane da chah tympiah tympra ki wei da khang leh wow lehkmen Christmas.
Heijooh i por da ong u wa ka sorkar u Modi kular ko wow e khih ya ki khynroo khyllood tangwa ym em u ye ko u leh yeitæ tangwa da toh u e buit ko ya ki khynroo khyllood kammon u kamai spah smat kamwa kamai u Jay Shah uwa da ku ka spah yong oo da 16, 000 chah hapoh chisnem.
Da pynbaad u wa toh ka sorkar u Modi kawa pynchlur ya ka kaam baam-tooh deiwa e nongmuna ya u Nirav Modi uwa da baam ya ka poisa hadooh T. 11,000 klur na ka Punjab National Bank, u Lalit Modi uwa da yut cha London dei yarap ka sorkar BJP, u Vijay Vittal Mallya uwa da yut na India hadien wa da baam ya ka poisa ki paidbah.
Da beiñ chooh chooh u ya ka sorkar u Modi wa suki hi-eh ko ya kini ki kaam baam-tooh ha ka tnat yada ri hei wow thied ya ki Jet yalehthma na France kawa kynjoh da ki spah hajar klur khlem yaklam wa kiwi tawon ki Company.
Discussion about this post