Shillong: Ka Meghalaya State Commission for Women (MSCW) hei yakrehlang waka yungkrehkaam ka District Social Welfare Officer, North Garo Hills, Resubelpara ynnin ka sngi da pynman ya ka yalang pynsñiawthooh ya ki manbei manpa hajrong ka phang “Personal Safety Education of Children” ha SGSY Hall, Resubelpara namo wow pynsñiawthooh ya ki manbei manpa wow tip u sikai ya ki khon ki kti yong ki wow lait ki u chah chim kabu ha ki bru wa em i thmu wa sih.
Ha kani ka sngi da em ka Theilin Phanbuh, Chairperson, Meghalaya State Commission for Women wa ki dkhot ka Commission wa kynthup ya ka Iadalin Tariang, ka Rebina Subba waka Annie Sohtun da emlang ki.
Kani ka yalang man ko kam chibynta ka lehkmen ya ka International Women’s Week kawa sdang nadooh kani ka chi tarik hadooh ka 8 tarik uni u bnai hajrong ka phang “Press for Progress”.
Ka Phanbuh da klam ko chaphang i emkaam wa ki bei ki pa u pynembor ki ya ki khon ki kti yong ki deiwa pynsñiawthooh ya ki kammon wow yait ki na ki wa jrong kti wa leh ki kaam khlemakor heijooh i por leh da pynchlur ko wow wan ki cha khmat lada jia iwon iwon ya ki khon yong ki wei wow pyntip cha ki bor ka aiñ pyrchah ya kiwa emkti u leh ya ki kaam pyrchah ya ki khynnah.
Ki bru chemphang hajrong kani ka kaam naka Faith Foundation, kiwa kreh wow yarap ya ki khynnah kiwa chah lehbeiñ khamtam kiwa chah slaitbor da yaklam ki wa kiwa emlang ha kani ka yalang wei da e ki leh ya ka sikai cha ki manbei manpa heiyatoh wa ki kaam yong ki wow yada ya khon ki.
Discussion about this post