Jowai: Ka Khasi Students’ Union (KSU) da pynsñiaw ki yei sñiawkhia yeiwa jia ha Tata Institute of Social Sciences (TISS) hei yatoh waka rai wow pyndam noh ya ka Post Matric Scholarship cha kiwa puræ kiwa em hapoh ka Scheduled Tribes (ST) wa Scheduled Castes (SC) iwa man i pyndooh yei hok yong ki heiwa da man chwa hei chah ieh dien kamjooh kiwa tlot hawa wyrchaw wa kiwa hapoh ka ri kiwa da biang lut.
Ka KSU da ong ko wa kiwa pyllai ya ka TISS kamjooh ka Ministry of Tribal Affairs, Ministry of Minority Affairs waka Ministry of Social Justice & Empowerment toh u chong pyrkhat sani bha ki yei chitom kiwa puræ kiwa man kam ki ST wa SC hapoh ka TISS yow lait u pynthut ya i puræ puthi yong ki kiwa cha khmat.
Da ong ka seiñ wa ki thong kini ki tnat sorkar toh wow kyntu wow pynkup bor ya kiwa khian paaid kiwa wan na ki manyung wa dooh wa duk yow pynku leh ya ka ri waroh kawi.
Kamtæ ka KSU sa chisien da kyntu ko ya kiwa pyllai ya ka TISS wow pyndam noh ya ka hukum wow pyndooh Post Matric Scholarships kamjooh wow pynyoh biang ya ki myntoi cha kiwa sah Hostel kamjooh yei bai baam yong kiwa puræ wa haap hapoh ka ST wa SC.
Ka KSU da pynkut ko deiwa ong wa lyngba ka Education Cell kamjooh ka KSU Bangalore Unit da pynsñiaw ki yei kyrchaan cha waroh kiwa puræ hapoh ka Tata Institute of Social Sciences ha waroh ki soo thaw wa em ko ha Mumbai, Guwahati, Hyderabad wa Tuljapur hadooh wow ye ki u yoh yei hok yong ki na ki thaw puræ kamjooh ka sorkar India.
Discussion about this post