Jowai: Ha kani ka tayaw sngi Hat, 16 tarik u Wisu ki wasan waheh, chakri niam ka Raij Jowai da chim ki wow pyndep ya ka lehniam Thoh Langdoh næ ka Kñia Blai Langdoh kawa man ka wi na ki lehniam yong ka raij wa nyngkong dooh hapoh ka raij ka chnong ha uni u snem 2018.
Kam wa pynkynmoo chwa wow poi kani ka sngi da kdar luti chwa da ka Kbai Mooknor heiwa u Dolloi, u Pator, u Langdoh, ki Sangot, ki Wasan deilang ki waheh wasian ka raij da mih ki chakhmat ka yaw ka syiem wow e wyrta chula na jrong u Mooknor wa em ha Iawmusiang.
Kani ka sngi Thoh Langdoh, katkam ka rukom ngait niam ki khon ka Niamtre da tip leh ya ka heiwi i kyntien kam ka Sang Sngi, ka sngi heiwa ki paidbah wa chong chnong kiwa dang em i ngait ha ka niamtre wayah watyoor ki warim yait ki nei pyntakha tadaiñ wei pyntngit pynjngut yei doh i pran ka Bei Rym-aw.
Ha kani ka step hadien wa da dep ka lehniam na Khloo Langdoh, ki wasan manda poi ha yung Langdoh em ki ka bynta wa kyrpang hei wow thung yow symbe toh, symbe saru, sakhia hei kpær i kpær i rasa wa em ha chrooh ka yung Langdoh heiwa ya kani ka rukom da tip heiwi i kyntien kam ka Thung Sang.
Kat kam ka wyrta chula u Dolloi, da ong wa ka lehniam ha kani ka step man ko kawa miat wabha deiwa yooluti leh wa i kyrkhu kyrdoh hapoh ka raij ka chnong u rap miat rap bha i ha uni u snem.
Discussion about this post