Shillong: Ki dkhot ka yung dorbar ynne ka sngi da yachim bynta ki chiboon wow yaphyllu yumut hajrong ka phang wa yatoh wa i wym yoh khih yoh kreh ki khynroo khyllood kawa da wanrah yei eh i khoo wa khroo bha.
Ya kani ka phang da wanrah da u MLA samen ka Mawphlang u Synter Klas Sun uwa da ong wa katkam ka tnat Employment Exchange du ha Khasi wa Jaiñtia Hills em hadooh 35 hajar ngut ki khynroo khyllood kiwa da nang da stat kiwa khlem khih khlem kreh wei em ki sa kamwa 3500 ngut na ka thaiñ Garo Hills.
U Sun da ong u wa kini kiwa khlem khih khlem kreh kynthup ki ym du ya kiwa da pyndep yei puræ wa khian tangwa wot hadooh kiwa da pyndep Engineering, BA wot ki Post Graduate.
Kiwi won kiwa yachim bynta ha kani ka yaphyllu yumut kynthup ki ya u Charles Pyngrope, ka Ampareen Lyngdoh, u Adelbert Nongrum, u Lambor Malngiang, u Zenith Ma Sangma, u Renikton L Tongkhar, u Thomas A Sangma nalor u Process T Sawkmie wa da wanrah ya kani ka phang.
Katwa uwa yahkhmat ka liang pyrchah, u Dr. Mukul Sangma da ong u wa ka jylla Meghalaya katni da em i suk i saiñ wei ini da wailaad ko ya ki bru samen wow wan seiñ khih ki heini.
Discussion about this post