Jowai: Ka chnong Lamin, kawa haap ha West Jaiñtia Hills District da pynneh pynsah ko ya ka riti ka dustur u warim deiwa pteiñ ya ka chaad tynre wa tip kam ka Chaad Rongkusi.
Katkam wa ong uwi na ki waheh ka chnong u Omin, kani ka Chaad Rongkusi toh ka chaad thma hadien wa wan uiñ ki kam kiwa jop ya ki Dkhar cha Ri-Thor.
Da ong wa hanlada katni da em i chongsuk chong saiñ khlem em kiwon kiwon de ki thma tangwa dang pynneh pynsah ya kani ka Chaad kawa da e wa da booh da u warim.
Ha kani ka chaad da pynman man la u snem wei da yachim bynta da ki dong ki kyntoit ka chnong Lamin.
Ya kani ka chaad katni da pynkhreh da pynwandur da ka Iatyllilang Social and Welfare Organisation ha madan Shad Khaw, Lamin wei da wan wai ya ka da u Everest Langstang uwa da man kam u kongsan hei sngi wei da wan pynhiar pyrda ya ka won hei miet da u Lahkmen Rymbui, MLA ka Amlarem Constituency uwa man leh kam u montri ka sorkar ha ka tnat puræ puthi.
Nyngkong dooh ha ka lympung chaad da yooh kjat da ki chynrang nadooh i por chiteiñ wei da pynkut ya ka chaad ka lehkmen ryngkat i kyriaw i risa hadooh wa da sep ka sngi.
Manda sep ka sngi wei sdang kem rngu da sdang psiah cha ka lympung chaad sa ki kynthai nadooh ki wa khian hadooh kiwa da khyllood.
U Everest hawa klam da e yaroh u ya ka chnong Lamin kawa dang kynmoo wow pynim wow pynneh pynsah ya kani ka chaad hadooh kani ka pateiñ wa katni.
Da ong u leh wa kani ka Chaad Rongkusi daw pynyatylli chooh chooh ko ya ki paidbah kiwa chong chnong yong ka kyntoit wa ki dong kiwa em hapoh ka chnong Lamin waroh kawi.
Discussion about this post