Jowai: U Chief Executive Member (CEM) yong ka Jaiñtia Hills Autonomous District Council (JHADC), u Moonlight Pariat ha kani ka Sngi Chohthat da hiar u wow sakhi da ki khmat yong oo ya ki chnong wa chah ktah hei hiar u slap wa u phria ha ka 30 tarik u Wisu (March).
Ha kani ka hiar sylli u CEM da synran ya oo da u MDC-Nongjngi, u Suklang Shylla, u MDC War East u LB Sumer wa ki sahep yong ka JHADC wei da emlang leh u waheh chnong ka Mynso A wa B wa kynthup ya u RM Khlem wa u M. Kya wa kiwi kiwi ki waheh.
Ha kani ka lai sylli u CEM ka JHADC wa ki MDC da lai ki cha ki kattu katni ki manyung ha Mynso wa ha Pamanik khamtam kiwa da chah ktah joor ha u phria. Ha Pamanik kiwa chah ktah toh ki manyung wa dooh wa duk.
Katkam ka yukheiñ kawa da e kiwa yahkhmat ka chnong wa du ha Mynso A wa Mynso B kiwa chah ktah da em 212 yung wa ha Pamanik (Lumpyrdi) na ki 400 tylli ki manyung 49 tylli toh kiwa da chah ktah joor ha u phria.
U ma RM Khlem, waheh chnong Mynso B, da pyntip u wa u BDO leh da wan hiar wow chim yukheiñ wow e yarap da ki Tarpaulin wei da paan u leh ya i pyrtuid yong waroh ki yung wa chah ktah.
Neiliang u CEM JHADC u Moonlight Pariat da kular wow e yarap katwa ye i bor yong ka JHADC cha waroh kiwa chah ktah ha u phria wei da kyntu u ya u waheh chnong wow pynpoi ya ki pyrtuid yong ki manyung wa chah ktah wow pynpoi smat ya ka yarap.
Discussion about this post