Shillong: Ka Meghalaya State Commission for Women (MSCW) da phah ko ya ki tnat pulit wow kem wut wut ya ki bru kiwa emkti wow chim yei mynsien yong kawi ka manbei ha Khliehriat iwa da jia ha ka miet yong ka 3 tarik uni u bnai.
Hawa klam wa kiwa pathai khubor, ka Chairperson ka Commission, ka Theilin Phanbuh da ong ko wa neiliang ka Commission dadep yaklam ko wa u Deputy Commissioner ka East Jaiñtia Hills wei kamjooh ya u SP wow kdong wei wow kem smat ya ki damok kiwa chim ya i mynsien ka Fullness Lyngdoh.
Ka Theilin da pynsñiaw ko yei mynsien sñiawkhia wa joor i chah thombor ki manbei ha kani ka jylla ha kini ki sngi iwa jia na ki por cha ka por.
Da ong ko wa kam ka Commission da leh ko wut wut ya kawon kawon ka kaam katkam i bor yong ka.
Heijooh i por da ong ko leh wa da jooh pynman ya ka pynsñiawthooh paidbah wow pynche ha kiwa boon ki thaw ha ka jylla chaphang ki hok khamtam i hok ki manbei yow tip ki kammon u yada pyn daki yaki hi.
Chooh chooh da ong ko wa ym du ini wa jia ha Khliehriat, ka Commission da booddien ko leh yeiwa jia ya ki kynthai kiwa chah thombor ha kiwi kiwi ki thaw kamwa jia ha Mawpun, i jia heiwa ka manbei da chah beh ko na thaw baam ha Delhi ha u snem wa da dep wa kiwi kiwi de.
Heijooh i por, ka Chairperson da kyntu ko ya ki kynthai wow man ki kiwa husiar hei long i man ki wei ymtoh u chah pynbiej ki heipor wa lai kreh ki cha baar wow yoh ya tulop wei toh u thooh yutip chwa yei sakhiat chwa wow lai cheiwon cheiwon.
Da ong ko leh hawa yalang chan leh, ki kynthai toh u man ki kiwa husiar wei wow bichaar bniah yow lait u mih i jia wa sñiawsih.
Discussion about this post