Jowai: Nadooh wa pyn-im biang ya ka Chaad Sukra ha Jowai, ha uni u snem da man ko ka sien wa 13 heiwa da leh kmen ya ka ha Jowai.
Ha Jowai ynne ka sngi ka Chaad Sukra ha Jowai man ko kawa phooh wa phieñ wei da sdang chwa ya ka na Madan Mynkoi Pyrdi heiwa da wan sakhi u MLA ka 2 Jowai, u Wailadmiki Shylla kam u kongsan.
Ka phang pdeiñ ka Chaad Sukra ka Seiñ Raij Jowai ha uni u snem toh “A! Bei Rymaw, na rupai iong pha wa joo wa kai, ka um ksiar um rupa ha sla pyrthai”.
U Kongsan hei klam yong oo da ong u wa katni da duna bha kiwa rep tangwa ka Chaad Sukra u pynman ya waroh wow burom ya kawa da yah luti u warom wajah.
Haden ini da pynman ya ki chaad na ki chnong waphær waphær kiwa da pyn ka-it ya ki paidbah kiwa wan da ki phaw spah ngut wow sakhi ya kani ka Chaad Sukra.
Yeini da pynbood sa ka Mih Yaaw heiwa da pynriam ya ki kari kiwa tem ya ki sur wow chaad paidbah hadooh wa poi Iawmusiang.
Manda poi ha yaaw hajan ka MTC da em ka yalang heiwa u MLA ka Mawhati u Dasakhiatbha Lamare da man u kam u kongsan uwa da ong wa kam ka phang ka Chaad Sukra kawa klam ya kawa emkaam wa ka juk kawa katni u pyrkhat ki ya ka mynried yong i kamtæ emkaam wow yada ya ka Bei Rymaw.
Hadien ini da pynwyrngia ya ki paidbah kiwa wan paitke da ki chaad wa da pynkhreh da ki chnong wa ki Seiñraij waphær waphær kamjooh leh da em ki dhab wa chaad kiwa wan nadooh na Manipur kiwa da chaad ya ka Lhaou Sha Dance.
Discussion about this post