Shillong: U Montri ka tnat Social Welfare ka jylla, u Kyrmen Shylla da ong u wa ka sorkar pyrdi da phah ko wa waroh kiwa yoh myntoi na ka Scheme ICDS toh u leh ki ya u Aadhaar Number khnang wa i yarap wa yoh ki u neh i lyngba yong kani ka Scheme wei da booh ya ka 30 Naiynru yong uni u snem kam ka sngi wa khaddooh wow leh yeini.
Hawa jubab yeiwa kylli u MLA ka Rangsona u Zenith M. Sangma ha yung dorbar ynne ka sngi, uwa kwah wow tip lada toh iwa sakhiat wa i saam ya ki mar baam ya ki manbei kiwa e yimbu khon wa ki khynnah da pynslem neidaw wa ym em leh Aadhaar ki.
Katkam wa ong u montri, em kamwa 5 lak ngut kiwa haap yoh myntoi na kani ka Scheme e baam ka sorkar pyrdi.
Tangwa heijooh i por, u montri da ong u wa katni ka sorkar jylla ym phah ko wow leh Aadhaar wei dang pyrkhat wow yaklam wa ka sorkar pyrdi wow pyllait na ki kyndon wow leh Aadhaar.
U Kyrmen da ong u wa kani toh ka Scheme ka sorkar pyrdi wei da mang T. 34 klur neibynta uni u snem ya ka jylla Meghalaya.
Discussion about this post