Jowai: Ka Jaiñtia Student Movement (JSM) Central Body da pyntip ko wa nadooh u snem 2016 da yakhun ko wow yoh ya ka Government College ha East Jaiñtia Hills District neibynta ki khynroo khyllood ka District kiwa yachem chiboon i eh wow lai puræ chadooh cha Jowai ha Kiang Nangbah Govt. College neidaw wa haap pynlut ki ya ka bai yung-wai kamjooh ka bai lai bai wan wei ini da wanrah ko ya kiwa boon wow pep noh ki chiteiñ por ya ka puræ yong ki.
Ka seiñ da ong ko wa katkam wa da yoh yutip wa du hapoh ka East Jaiñtia Hills ki khynnah wa pep skur chiteiñ por em ki kamwa hadooh 916 ngut nadooh u snem 2014 hadooh katni. Kamtæ ka seiñ da sñiaw ko wa toh u em da ka College sorkar ha ka thaiñ khnang wow pynsuk ya kiwa lai puræ.
Ka seiñ JSM da dep phah ko ki dorkhat cha ka sorkar jylla na ki por cha ki por tangwa ym em yoh ya ka jubab wa che. Tangwa dang kyrmen wa da i mynsien wa chynrang u yakhun hadooh wa yoh ya ka College sorkar ha East Jaiñtia Hills District.
Khnang wow pteiñ ya ka yakhun yong ka seiñ neibynta kani ka kaam, ka seiñ da rai ko wow pynman ya ka yalang paidbah ha ka 27 tarik uni u bnai heipor 10:00 waje i step ha Madan Football Wapungskur.
Ka seiñ da kyrpaad ko ya ki para seiñbhalang waphær waphær, ki bru wa pawkhmat ki District ka ri-loom Jaiñtia, ki waheh chnong, ki Secretary chnong, kiwa sikai skur, ki khynnah skur wa kiwa puræ College, ki manbei manpa, ki khynroo khyllood wow sñiawbha ki wow wan deiwa chit mynsien cha kani ka yalang paidbah.
Discussion about this post