Shillong: U MLA ka Jowai Constituency, u Wailadmiki Shylla ynne da yachem u ya u montri ka tnat puræ puthi ka jylla, u Lahkmen Rymbui ha kamra krehkaam yong oo (Lahkmen), ha Shillong heiwa da pynsñiaw u yei eh i khoo wa yachem ki khynnah puræ hapoh ri-loom Jaiñtia.
U Wailadmiki da ong u wa ka puræ puthi hapoh chnong Jowai man ko kawa pyrdi ym du ya ka ri-loom Jaiñtia tangwa ya ka jylla hi leh waroh kawi wei ka sorkar emkaam wow pait wei wow ngam yillu bha ko yeini.
Da ong u wa em du ka wi ka Government College hapoh ri-loom Jaiñtia (West Jaiñtia Hills wa East Jaiñtia Hills) katæ toh ka Kiang Nangbah Government College kawa esikai ha ka kyrdan Higher Secondary wa Graduation. Da pynrap u deiwa ong wa heipor Admission da ki hajar ki khynnah kiwa kwah u lai puræ ha ka HSSLC ha kani ka thaw puræ tangwa neidaw duna thaw da pynbor ya ki wow thooh thaw puræ ki chawi wot hadooh wow dam noh u lai puræ.
Kamtæ neiliang u Wailadmiki da kyntu u deiwa e yumut ya ka sorkar wow pynku kyrdan noh ya ka Jowai Public School deiwa sdang noh ya ka Higher Secondary kawa tip leh kam ka Indian School Certificate (ICS) Examination hapoh yong ka Council for the Indian School Certificate Examinations neibhah wa deiwa leh kamtæ daw e ko yei hok cha waroh wow yoh ki u puræ.
Da pyntip u leh wa kani ka skur emkaam ko ya ki kamra Classroom, ka Library, ka Auditorium, ka madan yalehke, wei iwa kongsan dooh toh ka Examination Hall neibhah khlem kani, ye ka skur u dooh noh ya ka Examination Centre na kani ka skur iwa ye u ktah ya kiwa boon ki khynnah heiwa hap lai thoh Exam ki cha Shillong.
Discussion about this post