Jowai: Ka Futsal Association of Meghalaya (FAM) kam chibynta wow lehkmen ya ka lyngkhooh dap chi snem kawa tip leh kam ka Foundation Day kawa haap ynnin ka 19 tarik, ka FAM da pynman ko ya ka “Awareness Camp on FUTSAL” ha Alpha English Higher Secondary School, Nongpoh, Ri-bhoi District heiwa 5 tylli ki skur da wan ki wow embynta wa kynthup ya ka Ri-bhoi Presbyterian Higher Secondary School, ka Alpha English Higher Secondary School, ka RBP English Secondary School, ka Christian Higher Secondary School waka Oasis English Secondary School.
Ha kani ka sngi u Goldenstar Suchiang da pyllai u ya ka yalang wei da yoh ya ki kyntien pdiang sñiawbha na u Debertgil Dkhar, u Vice-President ka FAM.
Ka kongsan ha kani ka sngi ka W.B.K.Blah, Principal ka Alpha English Higher Secondary School da e mynsien ko ya waroh wa emlang wow kreh chitom ki ha jar jiar ki luti wa ka-it mynsien ki hanlada man ko ha ki kaam puræ puthi kamjooh ki kaam Sports.
Da ong ko waka Sport toh kawa emkaam bha wow yoh ya i doh i pran wa chait wei man ko leh ka rynsan heiwa ye u man ko kam ka laad imja kpoh wei ym toh u pyn sepai ya i sap wa em.
Da pdiang ko wa kani ka luti wa da jied ka FAM wow pyntipmit ya ka FUTSAL daw yarap ko ya kiwi leh wow pynyoo yei saap yong ki wei da kular ko leh ya ka FAM wow kyrchaan yeiwa da sdang ki wei da yooluti ko leh wa daw pynbiang yeiwa emkaam ki khynnah wow ku ha kani ka yalehke.
Yow pynsñiawthooh chaphang ka FUTSAL da yoh ya i klam na u Fieldingstar Sun, License Coach, FAM wa na u Dauniwanchwa Phawa, License Referee, FAM.
Da em leh ka ya phyllu yumut wa ki khynnah skur kiwa chongchit wow chimbynta ha ka FUTSAL kiwa da thrang wow poi cha ka thong wa ha khlieh dooh.
Ya ka yalang da pynkut da ki ktien sñiawngooh na u Wompher Lamare, Executive Member,FAM.
Kiwi kiwa klam ha kani ka sngi toh u Dr.Brightstar Langbang, President FAM.
Discussion about this post