Khliehriat: Hadien wa ku i pynemkaam ki khynroo khyllood ya ka Social Media ha kani ka juk kam ka Facebook, WhatAapp, Instagram, WeChat wa kiwi kiwi, ka seiñ Socio-Economic Development Society (SEDS) Khliehriat ynne ka sngi hapoh i yahkhmat u President yong ka, u Deibormi Syad dei sñiawkhia da pynman ko ya ka yalang pynsniawthooh paidbah hajrong ka phang “Impact of Social Media and Cyber Crime”.
Ya kani ka yalang da pynman neibynta ki khynnah Class XII Arts yong ka skur Khliehriat Higher Sec. School, Khliehriat ha Don Bosco Hall, Khliehriat.
Ha kani ka sngi da emlang u muktiar na ka Khliehriat Bar Association, u Dawan Pachiang uwa da klam hajrong ka phang heiwa da pynsñiawthooh u wa ka Social Media yarap ko chiboon tangwa i kyrni (Addiction) da pynsih pathan ko ya ki khynnah chynrang wa kynthai kiwa khai khynroo.
Da ong u wa deiwa phah (Share) ya ki dur ki dar ha ki Social Media kiwa pynyoo ya ki kaam wym man wa ki kaam ya haap kurim yei wow ktah ya i bor pyrkhat pyrdaiñ ki bru wei ye i leh wow em bynta ha ki kaam pyrchah aiñ.
Da pynsñiawthooh u leh chaphang ka kyndon Section 66A of IT Act kawa klam chaphang kiwa daisarom ya uwon uwon namo kawon kawon ha Social Media ye ki u chah kset patok.
Ha kani ka sngi da yoh leh i pachat yumut na ki kynnah wei neiliang ka seiñ da kular ko leh wow pynman biang kam kani ka esikai neini chaphrang.
Discussion about this post