Khliehriat: Ka Inter School Athletic Meet 2018 wa le sngi wa pynman da ka yungkrehkaam u District Sports Officer, East Jaiñtia Hills District da wai ya ka ynne ka sngi da ka R.S. Manners, Addl. Deputy Commissioner, East Jaiñtia Hills District heiwa da em hadooh 32 tylli ki skur kiwa wan chimbynta ha kani ka yakop.
Ka R. S. Manners hawa e i klam da e mynsien ko ya ki khynnah wow man ki kiwa minot ha i puræ puthi wei ymtoh leh u ieh ki yei yalehke Sports kawa man kawa emkaam bha yow yoh i doh i pran wa chait wa khiah. Da ong ko leh wa kam ki khynnah skur emkaam wow kiar na ki kaam wa sih wei wow pyllai yumut ha ka puræ puthi.
U K. Passah, District Sports Officer, East Jaiñtia Hills District da e u i kyntien pdiang burom deiwa e khublei leh ya ki para wa kreh u kiwa da ye u pynman ya kani ka lympung yalehke Sports.
Ha ka bynta wa nyngkong da pyndep ya ki yalehke kam ka Short-Put yong ka Under-18 Boys heiwa u Ksansing Bamon na ka Sacred Heart Secondary School da yoh u yei naam wa nyngkong, katwa u Phot Bang na ka Seiñ Raij Tuber Secondary School da yoh u yei naam wa ar katwa yei naam wa le won da yoh da u Benjamin Limbu na ka Sacred Heart Boys.
Ha ka Discuss-Throw (Girls), ka Beautiful Phawa na Step by Step Secondary School da yoh ko ya ka takma ksiar, ka Deimipaia Siangshai na ka jooh ka skur da yoh ko ya ka takma rupa katwa ka Lanosha Sutnga na Tluh Secondary School da yoh ko ya ka takma tama.
Discussion about this post