Jowai: Ka Jaiñtia Student Movement (JSM) Central Body ha ka kyrwoh khubor wa phah lyngba u Publicity Secretary ka seiñ u Skhembhalang Dkhar da pyntikna u cha kiwa chong chnong ka East Jaiñtia Hills wa ka yalang paidbah wa da khut wow pynman da ka seiñ u man ko kawa lai bait haka 27.04.2018 heipor 10 waje ha Madan Football Wapung Skur.
Chooh chooh da ong u wa ha katai ka sngi daw emlang leh u MLA ka 6 Khliehriat Constituency wa u MLA ka 5 Sutnga Constituency kamjooh waroh ki 9 ngut ki MDC napoh ka East Jaiñtia Hills.
Kamtæ ka seiñ da kyrpaad ko ya kiwa chong chnong ka East Jaiñtia Hills waroh nadooh ki manbei manpa, ki bru pawkhmat, ki waheh chnong, Secretary chnong, ki para seiñbhalang, kiwa sikai deilang wa ki khynnah skur khamtam ki khon khynroo khyllood wow wan ki khlem pep cha kani ka yalang ka wow paan College sorkar hapoh East Jaiñtia Hills.
Hawa pynsñiaw yei sñiawkhia, uni uwa yahkhmat ka JSM da ong u, “Ki khon khynroo khyllood yong ka East Jaiñtia Hills District ki yachem ki chiboon i eh i khoo wow yoh u lai puræ College na East Jaiñtia Hills chadooh Kiang Nangbah Govt. College kawa em ha Jowai, West Jaiñtia Hills District neidaw wa haap ki wow pynlut ha ka bai chong yung wai, bai baam, bai kari wa kiwi kiwi ki emkaam.”
“I wym em ka College sorkar ha Khliehriat da pynman ko ya ki khon khynroo khyllood wow pep ki yei puræ chiteiñ por neidaw wym ye ki bei ki pa wow kyrchaan ya ki khon.”
Ka JSM leh da dep phah ko boontylli ki dorkhat cha ka sorkar jylla na ki por cha ki por tangwa hadooh katni ka sorkar ym em jubab ko iyi iyi hajrong ini wa dawa ka seiñ kamjooh ki paidbah ka East Jaiñtia Hills District.
Also Read: Chisur rai ki paidbah wow dawa College Sorkar ha East Jaiñtia
Discussion about this post