I sñiaw ki paidbah ka West Khasi Hills ya i chah kyrriah kaam u Arunkumar Kembhavi kam u DC

Nongstoin: I kyrriah kaam noh ka sorkar ya u Deputy Commissioner ka West Khasi Hills, u Arunkumar Kembhavi man ko kawi na ki phang kawa chit bha ha Nongstoiñ hadooh wa da em leh kiwa thmu wow rah da ki lama yong kam ka dak wow pyrchah ya i kyrriah kaam ya uni u sahep, heiyatoh wa kani ka kaam neiliang kiwa thoh khubor da thooh yumut ki yei sñiaw ki paidbah hajrong ini.

Hawa yoh u yaklam wa kittu katni ngut kiwa chong chnong da pynsñiaw ki ya jar jiar i sñiaw yong ki.

U EK Dewsaw uwa kamai kari da ong u wa man i iwa sahnood, ka rukom krehkaam uni u sahep da yoo wa man ko kawa lai bait lai ryntih bha kam ha ka rukom pynbna paidbah ya ki post lait kreh ha DSC wei kamjooh leh ki kaam wa yatoh wa ka roi ka paar.

Hawa thooh yumut won na ki paibah na ka thaiñ nongkyndong, uwi u waheh u wym kwah pynmih pyrtuid da ong u, kam ki nongkyndong ki wym tip ya ka aiñ nadooh wa sdang wa tip u khih mylla donhi deiwa khat chyiap na wah wow psa ya ka yung ka sem wow pyndap ya ka baam ka dih, ki ym ye wot wow phah skur khon ha ki skur kiwa miat, tangwa kattæ leh da sdang noh i wow dooh noh hadien wa da chah maham ha uni u sahep heiwa da ong wa lada pteiñ i wow khat chyiap na wah daw chah kem noh i. Da ong u wa ha ki snem nachwa ym jooh maad ya kam kini i eh i khoo wow dooh noh yei khih.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kawi ka manbei da ong ko, ym beiñ ko ya u næ ka rukom kreh kaam u DC, tangwa lada ye bha dooh toh wa lah da u Khasi neibhah wa boon hi na ki bru ymtoh kiwa stat wow sñiawthooh ya ka ktien ka thylliej hawa yatoh kaam wa uwon uwon u sahep u wymtoh u Khasi, wot ki Rangbah Shnong kiwa boon hi ymtoh kiwa da stat, uni u sahep leh ymtip wei ym sñiawthooh u leh yei rukom pyllai chnong khamtam hapoh ka Hima Nongstoiñ neibhah uni u sahep rap tip u ya ka aiñ ka ri. Heijooh i por kani ka manbei da ong ko wa i rukom krehkaam uni u sahep ym em iwon iwon i wow boh namo wow khñium pyrchah ya oo kam u sahep.

Katwa uwi na ki waheh, da silet u ya uni u sahep neibhah wa man u u bru uwa kreh hok ha ki kaam neibhah yeini ymye u len, tangwa iyi iwa da jia toh iwa dadep wei da toh u kutnoh, heijooh i por da ong u wa lada mih biang kawon kawon ka wym sñiawthooh hapyrdi kiwa chong chnong, u DC leh toh u bahkhlieh u wei heitæ u tip i wa man u u bru uwa kammon.