Jowai: Ka AJYWO Central Body ha u khubor wa pyllait da u MH Dkhar, President yong ka seiñ da beiñ ko ya u Tyrkeh Sumber na ka chnong Sanaro, wa katkam wa da mih ha ki khubor da chah pynbaad u wa slaitbor u ya kawi ka khynnah kawa dang 8 snem i rta ha ka 30 tarik u bnai wa dadep.
“I roi kini ki kaam pyrchah yei hok ki kynthai kiwa dang lui lui da pynman ko ya ki manyung mansem khamtam ya ki khynnah kynthai wym yoh de ki u im dei sñiawchngaiñ mynsien,” ong u MH Dkhar.
Ka seiñ da kyntu joor ko leh ya ka yungbichaar wa emburom kamjooh ya ki pulit wow kreh chitom yow ye u pynchitom ya kiwa emkti ya kini ki jait kaam wei kini ki jaitbru kiwa ym toh de kam ki bru kiwa da man kam ki mrad khloo.
Ka AJYWO da e yaroh ko leh ya ka sorkar ka ri India kawa da booh por 6 bnai wow pyndep bichaar ya kini ki kaam wa haap hapoh ka aiñ Protection of Children from Sexual Offences (POCSO) Act 2012 wei da yoooluti ki waka yungbichaar wa emburom wow bichaar hok ko yow pynchitom ya kiwa emkti.
Discussion about this post