Dang neh ka soskular ka sorkar jylla wa ka KPC Group wow chna ya ka Shillong Medical College: Hek

Shillong: U montri wa pait ya ka chait ka khiah hapoh jylla, u Alexander Laloo Hek da ong u wa hadooh katni ka sorkar dang pynneh ko ya ka soskular MoU waka KPC Group na Kolkata, neibynta wow chna ya ka Shillong Medical College kat wym pu chim ya ka rai wow pynrem ya kani ka Company da ka aiñ.

Rap nachwa ka seiñ CSWO da pynsñiaw ko yei pyrchah ya ka sorkar hajrong wow ekti ya kani ka kaam chna Medical College cha kani ka Company kawa da khlieh da u Kali Pradip Chaudhuri, neibhah wa da em ka chah ujor ha khmat ka Enforcement Directorate wa toh kani ka Company emkti ko ha ki kaam thok kaam chukor.

U Hek da pynskem u ya ini hadien wa da kut ka yalang wa ki sahep ka tnat ka chait ka khiah kawa pynman ha TB hospital, Shillong.

U montri da ong u hadooh katni ka sorkar dang pynneh ko ya kani ka soskular wow ekti ya ini i kreh cha ka KPC Group, tangwa lada ye u pynsakhiat wa emkti ko ha ki kaam thok, neiliang ka sorkar daw pyrkhat ko deiwi.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da  ong u wa hadooh katni ka sorkar dang dep ko wow soi du neibynta wow ekti katkam ka PPP Mode, katwa ya ka Land Agreement ympu ym soi ya ka.

U Hek da ong u wa ka sorkar ka sñiaw emkaam jhan palat noh wow chna ya ka Medical College ha Shillong neibynta wow yoh myntoi ki paidbah, da pyntip u leh wa ha kani ka yalang da emlang u MLA ka thaiñ, u Mahendro Rapsang, u Addl. Chief Secretary ka jylla, u PW Ingty kiwa da chong yaphyllu yumut kammon wow chna ya ki sarok wa bha wow lai cha katai ka College nalor kiwi won kiwa emkaam.

Ya ka Shillong Medical College da booh wow chna ha i thaw wa em ka TB hospital, ha Jhalupara katwa ya ka TB Hospital u kyrriah noh cha Umsawli, Mawdiangdiang.

Ha iwi tawon i liang, u montri da ong u wa ka sorkar ym kyrriah ko ya kiwa kjut cha ka hospital wa thymme kat wym pu ye u pynbiang lut ya waroh i emkaam ha katai ka hospital nadooh ka um, ka bordiñ wa kiwi kiwi.

Da ong u leh wa ka sorkar da booh thong ko wow pyndep noh hapoh uni u snem ya ka TB hospital ha Umsawli khnang wow yoh u sdang noh u kreh ya ka Medical College ha Jhalupara.