Pynman ka NH-51 Rebels ya ka yachemlang kiwa yah thuk thuk ha WGH

Tura: Ka NH-51 Rebels (Royal Endfield Bike Enthusiasts and Lovers Society) da lehkmen ko ya ka lyngkhooh dap 10 snem ka seiñ kiwa yah thuk thuk Royal Enfield deiwa pynman ya ka yachemlang kiwa yah Royal Enflield na ri-loom Garo ha Amingokgre Rural Resort, kawa em kamwa 30 km na chnong Tura ha West Garo Hills hajrong ka phang “Litter Free Garo Hills, Let’s Make it a Reality”.

Ha kani ka yachemlang da em 58 ngut kiwa yah thuk thuk na ri-loom Garo Hills wa na Assam kiwa da yachemlang wow rah ya ka khubor wow pynman ya ki chnong waka rymaw kawa khooid.

Ynnin ka sngi da pynman ki leh ya ka pynkhooid ya ka Inter-State Bus Terminus (ISBT) kawa em hajan ka chnong Tura.

“I thong ka NH-51 Rebels toh wow wanrah ya ka sñiaw yajan para wa yah thuk thuk wei wow chong pyrkhat ya ki kaam wa ye ki u leh yow sikai ya kiwi wow yah thuk thuk ki deiwa em i kitkhlieh deiwa pynman ya ki yalang pynsñiawthooh paidbah kammon wow sumaar syndong ya ki thuk thuk, wow bood ya ka aiñ yow lait u mih i sñiawthooh bakla hapyrdi kiwa yah wa ki bor ka aiñ kamjooh wa kiwa chong chnong”, da ong u Titthue Momin, General Secretary, NH-51 Rebels.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kiwi de ki seiñ yah thuk thuk wa wan chimbynta toh ka Tribal National Riders, Williamnagar waka Tura Endfield Riders Clubs.

“Da yaklam i leh ya ka thong yonglang ki waroh ki seiñ wa kamjooh ki kaam wa ye u leh wow yarap ya ka imlang sahlang”, da ong u Momin.

Da pynman leh ya ki yakop yimpa wa ki yakop yakhun kti ha kani ka yachemlang. “I yah thuk thuk ym du wa man ko ka wa ka-it mynsien i, yah i leh wa em thong wow yarap ya kiwi,” da ong u Piganath Sangma, uwa yah thuk thuk na Williamnagar.

Uwi na kiwa yah thuk thuk uwa da yah da boon snem u Saranjit Singh Beddy (60 snem) naka Rhino Riders Guwahati da ong u, “I wan yah thuk thuk cha ri-loom Garo man ko kawa sñiawsuk neidaw wa bha ki bru wei yei rukom pdiang ki ya i.”

Ka NH-51 Rebels man ko kawa naam ya kiwa boon ki kaam wa da leh ko kam wow pynman ya ki Peace Rally, Road Safety Week deilang wa ki pulit, ki Medical Camp wa kiwi kiwi de.