Shillong: U Montri Rangbah, u Conrad Sangma da ong u, ym ye wow kheiñstiñ ya ka By-Election MLA ha Ampati hanlada ka Party da jop suk ko ya ka Election MLA ha Williamnagar dang ini, da ong u wa ka Election yaphær ko na kawi cha kawi ka Constituency neibhah em jar jiar ki phang yong ki paidbah.
Da pynsñiaw u yei kyrmen wa na i jop ha Williamnagar ka wow ye u yarap ya ka party ha Ampati, tangwa da ong u wa ka yakhun em bait ko lada em kawon kawon ka Election wei ka party daw haap kreh chitom ko neibynta wow yoh rah ya ka thong na kani ka Constituency wa da ksoh da u Dr. Mukul Sangma ha ki 25 snem wa dadep.
Da kubur u leh wa i kynaad wa napoh ka Congress da yarap ko leh ya ka NPP wow jop suk na Williamnagar, wei ki paidbah leh yoo ki ya ini wa da sdang piah ka Congress neibhah ka Party ym em u e ko i kyrchaan wa pura ya ka MLA warim kawa man leh ka kyrtong ka party, ka Deborah C Marak, tangwa ini toh i kaamram ka Congress wei ymye u wow ong iyi iyi leh.
Da ong ki paidbah da e ki i chaniah ya ka Party wei kyrmen ki wa ha kani ka Election ha Ampati leh ki paidbah daw pynjop ki ya ka Party, heijooh i por da ong u wa naka NPP em du uwi u kyrtong uwa da phah da ka NPP Amapati Block Committee, u Clement G Momin wow man kam u kyrtong.
Hadooh ynne ka sngi ka yakhun na Ampati man ko hapyrdi ka kyrtong ka Congress, ka Miani D Shira, u Baku Chandra Hajong (BJP) wa u Clement G Momin (NPP).
Ka BJP emlang ko ha ka sorkar wa yahkhmat da ka NPP, tangwa neiliang u Conrad da ong u wa ka yakhun pyrchah ha ka Election ym embynta ko iwon iwon leh wa ka sorkar, deiwa ong wa ymtoh u yakhleh ya ka kaam saiñpyrthai wa ka kaam ha ka sorkar.
Discussion about this post