Jowai: Ka KSU-Jaiñtia Hills District Unit (JHDU) da phylla ko yei wym mano ka yungkrehkaam u DC ka EJH wow leh iwon iwon wow yada ya ka yingkieñ Ri Manar kawa em ha Samasi hapoh ka District.
Kam wow pynkynmoo, ka seiñ da e dorkhat ko ha yung krehkaam u DC ha ka 17 Naitung (April) lyngba u SS Syiemlieh (ADC) wow pyntip wa kani ka yingkieñ Ri Manar kawa da pynyoo ya ki dak wa da sdang piah ko iwa ye u wanrah yei mynsoo ya ki bru ha iwon niwon i por ka wow pynthut ya i lai i wan ki bru kiwa chaniah ya kani ka yingkieñ.
Hajrong kani hi ka jooh ka yingkieñ da pynkrehkaam da ka kyndon CrPC 144 wow khang ya ki kari heh kam ki truck kiwa kit plat 9 ton wow lai lyngba kani ka yingkieñ.
Neiliang u SS Syiemlieh da kular u wow kitkhia ya ini wei wow pyntip ya u waheh chnong ka Samasi wow sylli yeini chirup wa ka KSU tangwa ka seiñ da ong ko wa sñiawsih wa hadooh katni ympu em kawon kawon ka yutip wa da yoh wa ong wa chimkhia ka yungkrehkaam u DC.
Ka seiñ da pynbaad ko leh wa ye u em iwon iwon cha lyndet ini i kheiñstiñ ka yung krehkaam u DC hajrong ini neibhah wa ym em phah bru ko wow pait ya ini.
Kamtæ ka seiñ da kyrpaad ko ya kiwa mihkhmat ka thaiñ nadooh ki MLA hadooh ki MDC wow chimkhia ki yeini wow yada ya kani ka yingkieñ neibynta i bha i miat ki paidbah.
Also Read: Pteiñ ki truck wa kit palat pood wow lai lyngba ka yingkieñ ha ka Wah Ri Manar
Discussion about this post