Shillong: Ka World Honey Bee Day da pynemwarom ya ka ha All Saint’s Hall da ka yung krehkaam District Horticulture Officer, East Khasi Hills heiwa u montri ka tnat Agriculture, u Banteidor Lyngdoh da man u kam u kongsan katwa u Additional Chief Secretary and Agriculture Production Commissioner, u K N Kumar da man u kam u symbood kongsan.
I thmu kani ka yalang toh wow pynsniawthooh paidbah yei kordor ki ngap kam kiwa yarap wow pynmih soh pynmih syntu ya ka jaitbru hapoh pyrthai kiwa man leh ki lok ki warep kiwa dai ya kiwa boon ki mar rep.
U Lyngdoh hei klam da yaroh u ya kani ka yung krehkaam kawa kreh wow pynkynmoo wa emkaam wow yada ya ki ngap kiwa kyrpang khamtam kitu kiwa da jan wiar jait, heiwa ka sorkar thooh ko ki laad wow kyntu kynrong ya ka kaam rep deiwa pynkynmoo ya kiwa rep wa emkaam u neh ha ini i kreh wow psan ngap. Wow kyntu ya ka kaam psan ngap da kular u wow sdang noh ya ka Meghalaya Honey Bee Board.
U KN Kumar da klam yillu u hajrong i ma wa booh ki bru ya ki ngap kiwa da sdang wiar jait ha kylleiñ ka pyrthai, deiwa e nongmuna yei pynemkaam ya ki dawai tynyap khniang i daw wa khroo yow pynduna ya i em ki ngap.
U Kumar da ong u wa kawi na ki laad wow pynwiar yei duna namo i wiar jait ki ngap toh wow khang pyrchah yei pynemkaam dawai tynyap khniang (Pesticide) hapoh jylla.
Chooh chooh da ong u wa emkaam wow sdang noh ya ka Meghalaya Agriculture Research Institute khnang wow ye u yada ya kani ka kaam kamjooh leh wow pynpliah ya ka.
Ha kani ka sngi da yoh leh i klam na uwa psan ngap, u Tl Lyngdoh wa na u Pl Wahlang kiwa da pynsñiaw yeiwa da chem ki ha kani ka kreh.
Neiliang u kongsan ha kani ka sangi da saam u leh ya ki khusnaam cha kiwa jop yong ka yakop pynyoo rong ya ki ngap wa pynman ha ka 21 tarik uni u bnai.
Kiwi kiwa da klam ha kani ka sngi toh ka BN War, Director of Horticulture, Meghalaya, u PS Kharnaior, DHO, East Khasi Hills, Shillong wa ka M. Nongbri, District Agriculture Officer, East Khasi Hills, Shillong.
Discussion about this post