Shillong: Ka People’s Democratic Alliance (PDA) wa yahkhmat da ka PDF, kawa synchaar ha Khasi Hills Autonomous District Council (KHADC) da kynjoh ko yei em dkhot hadooh 28 ngut na ki 29 ngut ki MDC wei ini da jia i hadien wa kyrchaan sa ki MDC ka Congress ya ka lyngba ka chithi wa da phah ha ka 14 tarik uni u bnai cha u Pynshngain N Syiem uwa man u Chief Executive Member (CEM) heiyatoh wa ini.
Ya kani ka chithi da soi da u Kimfa S Marbaniang, MLA/MDC ka Rambrai Jyrngam; u Donevan Wanlang, MDC ka Sohra; u Lamphrang Blah, MDC ka Mawphlang–Diengiei wa u Process T Sawkmie, MLA/MDC ka Mawlai Constituency.
Ka PDA katni da kynthup ko ya ki MDC na ka PDF, Congress, UDP, NPP, HSPDP wa uwi u MDC samen katwa u MDC u wym emlang ha ka PDA toh u Adelbert Nongrum, MDC ka KHNAM na Jaiaw wei uwa man leh kam u MLA ka North Shillong.
U Pynshngain N Syiem hawa yaklam wa kiwa pathai khubor, da ong u, “Kam u CEM wa uwa yahkhmat ya ka PDA khamtam ha kini ki sngi wa em ki phang yaklam wa kongsan kiwa emkaam wow leh iwon iwon kam ka MUDA, Them Metor, ka VAB wa kiwi kiwi daw yarap i dei kyrchaan waroh ki MDC wei man i iwa emkaam bha wow pynneh ya ini dei thmu wow chim chooh ya kiwi ki phang wa emkaam”.
“Kam uwa yahkhmat pdiang sñiawbha O ya ki wei ym slem de daw khut O ya ka yalang ka PDA heiwa waroh ki dkhot ka PDA daw emlang ki” da ong u.
“Waroh chi kattu ha ka samoi kawa dadep toh ka Executive Committee yong waroh ki party wei sñiawsuk wa ha kani ka samoi krehkaam kawa ar leh, hadien le snem wa chimkti O kam u CEM wa poi biang i ha ka thong wow man ka Executive Committee aw jan waroh ki party,” da ong chooh chooh u CEM.
U Pynshngain da khut u leh ya u MDC ka Jaiaw deiwa ong, “Nga kyntu O ya u Adelbert wow e i kyrchaan khnang wow pynkhlan ya ka Executive Committee neibynta wow chimkhia ya ki phang yaklam wa kongsan, wei kyntu O leh ya ki lok MDC waroh wow booh i ya ki phang yaklam wa kongsan ha khmat wei wow burom ya ki lok kiwa da wan e i kyrchaan ya i.”
Discussion about this post