Jowai: Ka lehkmen World Environment Day kawa pynman da ka yung krehkaam u DC ka WJH kawa sdang nadooh ka 5 tarik uni u bnai hajrong ka phang “Beat Plastic Pollution” hei ya krehlang waka District Basin Development Unit da pynkut ya ka ynne ka sngi da ka yalang wa pynman ha Ialong Eco Park heiwa u Wailadmiki Shylla, u MLA ka thaiñ da emlang u kam u kongsan deilang wa u R. Rathap, IAS Deputy Commissioner cum Chairman District Basin Development Unit, Jowai, u D. M Wallang, MCS Additional Deputy Commissioner cum Vice- Chairperson DBDU, Jowai, u S.C. Laloo, ADC wei ya ka yalang da pynlai da ka Y.R. Mawlong, MCS, EAC, Jowai.
U Wailadmiki hei klam yong oo da yaroh u ya ka District Basin Development Unit wa pynman ya kiwa boon jait ki yakop wow wanrah ya i sñiawthooh paidbah nadooh ki khynnah skur yeiwa emkaam wow pynneh pynsah ya ka Bei Rymaw khamtam wow pynduna yei pynemkaam Plastic wa i sih wa mih naka.
Da ong u leh wa i man i kiwa embhah wa da kha ha kani ka jylla kawa miat wa yirngam kiwa ki warim yong i da chynna jngai ki yei emkaam wow pynneh pynsah ya ka rymaw deiwa yada ya ki khloo ki kjam kam ki khloo chnong ki khloo kyntang wei katni waroh emkaam wow bood ya iwa yah ki warim wow yada yeiwa da kyrkhu ka rymaw. Da pynchlur u leh ya waroh wym hoi u noh roi ya ki jhep wa ki yusong baam wa dadep pynemkaam kiwa ktah ya ki um ki wah wa ki mrad kamjooh u em i kitkhlieh hawa pynemkaam ya ki Plastic kamjooh wow pynduna ha yung ha sem kamjooh heipor wa lai luti wei lada ye toh u pyndam syndon wow pynemkaam Plastic.
Neiliang u Deputy Commissioner u R. Rapthap da ong u wa im i du chisien donhi kamtæ waroh ki kaam wa leh toh wow pyrkhat ya ka juk wow wan wei da ban joor u leh yeiwa emkaam wow yada ya ka wah Myntdu.
Ha i step kani ka sngi da yahke ya ki khynnah skur wow uiñke ki hapoh ka Ialong Park hei emlang ki bru wa chemphang kiwa da khana ya ki chaphang ka rymaw kam u D. Lamar, Asst. Director of Agriculture, Jowai waka H. Lato, Divisional Forest Officer (wild Life) kawa da klam chaphang i emkaam wow yada ya ki mrad khloo.
Ha kani ka sngi da em leh i thung dieñ wei da saam leh ya ki khusnaam cha kiwa jop ha ki yakop waphær waphær kiwa dadep pynman.
Da em leh ka yalehke wa tbian na ka NSS Unit ka Kiang Government College hajrong ka phang wow pynduna yei pynemkaam Plastic wa i rwai pdiangburom na kiwa puræ ka Thomas Jones Synod College, Jowai.
Discussion about this post