Jowai: Ka Dorbar Chnong Sohmynting, West Jaiñtia Hills District ynnin ka 23 tarik da pynkup burom ko ya u Sñiawbhalang Dhar uwa man kam u montri ka tnat Commerce & Industries, Soil and Water Conservation, C&RD etc, wa ya u Wailadmiki Shylla uwa man kam u MLA ka thaiñ kamjooh u Chairman ka Meghalaya Commision on Resource Mobilization ha ka yalang wa pynman ha Community Hall Sohmynting wa pynlai da u Waheh Chnong, u D. Pyrtuh.
Ha kani ka sngi da emlang leh u Madonbai Rymbai CEM ka JHADC, ki waheh naki chnong waphær waphær ki khynnah skur wa kiwi kiwi.
Neiliang u Sñiawbhalang Dhar wa u Wailadmiki Shylla hei klam yong ki ha kani ka sngi da chim ki leh ka laad ka kabu wow e khublei kyrpang ya ki paid ka chnong Sohmynting wa da e ki i chaniah wa i kyrchaan wa pura lyngba ka kti timun tidiang yong ki, kattu won sah sei kaamram yong ki kam kiwa mihkhmat wow wanrah i roi i psar hapoh ka chnong ka thaw chirup i ya krehlang wa ki paidbah.
Chooh chooh da ong ki wa lyngba i yachem yumut wa kiwa heh ka chnong daw pyrkhat yow pyndep chwa yei kaam wa hakhmat dooh, tangwa kattæ leh emkaam i yatylli weiwa ymhoi u jhan ware neibhah dang du 3 bnai man ki kam kiwa mihkhmat dang haap u yaichah wa dang boon ki kaam ki policy wa ka sorkar leh dang pynkhreh ko.
Neitæ kamwa ka Jowai Water Supply Scheme leh haap ko haka chnong Sohmynting, neiliang u Wailadmiki da ong u wa ymem chong kli kti u hei yatoh wa kani ka project wa dang sahteiñ, weiwa oo da thooh u ki laad ki luti yow ye u pyndep smat ya ka.
Nalor i pynkup burom ya kini ki waheh da ka dorbar chnong, da ioh leh i pynkup burom na ki dong waphær waphær deilang i klam pdiang burom daki waheh dong yong waroh 4 tylli ki dong hapoh ka chnong.
Da pynchongchit chooh chooh ya kani ka sngi dei rwai i chaad wa da e daki khynnah skur ka U.P & Secondary School Sohmynting, ka Dongwah U.P. School wa kiwi kiwi.
Discussion about this post