Shillong: Ynne ka sngi ki bor ka Shillong Municipal Board (SMB) da pynman ki ya i pynlang wa i thoh Census ya ki kharmator kiwa sah ha Them Iewmawlong kamwa da phah da ka High Level Committee.
Katwa ka SMB dang leh ko yeini ha kani ka thaw, da mih biang ki manbei wa kynthai kiwa sah ha Sweeper’s Colony wow chong kyllaiñ myngngor deiwa rah ya ki kot rben wa da thoh ya ki kyntien wa pyrchah ya ka High Level Committee, wei kamjooh leh wow pyrchah ya ka sorkar kawa thmu wow kyrriah noh ya ki na kani ka thaw.
Kini ki bru da khang tylla lut ki ya ki yung ki sem yong ki wow khanglaad ya kiwa kreh ka tnat wow pyndep yei kaam, tangwa ki bru ka Municipal da pyndep bait ki yei kaam deiwa thoh number ya ki yung.
Neiliang u Chief Executive Officer (CEO), u BS Sohliya da ong u wa ka Municipal daw pyndep ko yeini kamwa da phah da ka sorkar jylla lyngba ka High Level Committee (HLC). Da ong u wa daw pyndep lut ya ini i thoh Census smat katwa ye wei daw pteiñ mynstep lada ympu dep yei kaam ynne ka sngi.
Ya ini i thoh Census da leh hapoh i sonteri ki pulit wa joor ha kani ka thaw, wei da synraan ya ki bru ka Municipal kiwa da psiah cha ki luti kiwa khian wa kiwa kdong.
Ha kani ka tayaw wa dadep, ka Directorate ka tnat Land Records and Surveys da pyndep ko yei sorjamlin ya kani ka thaw.
Ha iwi i liang, ynne ka sngi ki dkhot ka National Commission na Delhi da wan ki wow thooh yutip bniah hajrong ini, hadien wa da yoh ujor ki chaphang ini.
Discussion about this post