Shillong: Ka yaleh wow yoh ya ka Civil Sub-division neibynta ka Mawsynram kattu la 20 snem tangwa ympu man kaam ko wei ka yalang yong ka Mawsynram Civil Sub-Division Demand Committee kawa da chong yalang ynne ka sngi ha Shillong da rai ko wow booddien yeini wei wow e dorkhat ha ka sorkar yeini i jooh.
Hawa yaklam wa kiwa pathai khubor, u MLA ka Mawsynram uwa man leh u Chairman ka Committee, u Himalaya Shangpliang da ong u wa ka yalang da rai ko wow pyndep noh u pynkhreh ya ki dorkhat neibynta wow ekti cha ka sorkar chwa wow wai ya ka Ranikor Civil Sub-division.
Da ong u wa i dawa Civil Sub-division da sdang i la kamwa 20 snem nachwa wei hadooh katni ympu em randien ki neini.
Da kynthah u leh ya u MLA warim u ka thaaiñ, u Pynshgnain N Syiem, deiwa ong wa ha ki por wa man MLA u da em ini i dawa tangwa ym em booddien u yeini deiwa ong leh wa da khut ya u Pynshngain wow em u ha kani ka yalang yeiwa da kyntait u wow emlang.
Heiyatoh wa i pynbaad u Pynshngain wa i dawa Civil Sub-division toh i por wa bakla, u Himalaya da ong u wa kani ka kaam ym man ko kamtæ neibhah da jooh pynsñiaw yei jooh nadooh i por u MLA warim, u DP Iangjuh, u M Kharshandy, hadooh i por u Pynshgain leh wei katni nawon heipor wa man MLA u (Himalaya).
U Himalaya da ong u leh wa i pynbaad u Pynshngain wa i dawa Civil Sub-division du wa yoh ya ka Ranikor man i kamwa kwah wow thied TV tangwa da thied won sa kiwi wei man i i klam iwa khlem yurim.
Discussion about this post