Jowai: Ka Mowtyrshiah Presbyterian District lyngba ka Social and Economic Life Development Committee chirup wa i krehlang wa ka yungkrehkaam ka District Forest Officer, West Jaiñtia Hills, Jowai da pynman ko yei pynche paidbah namo ka Awareness Programme wa chi sngi ha ka 23 tarik uni u bnai ha Lumpdang, Mowtyrshiah.
Kani ka pynche paidbah toh hajrong ka phang ‘Ka Jingpynneh Pynsah ia kiba don Jingim na ka Bynta ka Lawei.’
Ha kani ka sngi da wan emlang ki bru wa chemphang kiwa kynthup ya ka H. Lato, District Forest Officer Wildlife wa u J. M. Pohsngap, Divisional Forest Officer, Forest Utilization Division: Shillong.
Da yachim bynta chongchit ha kani ka pynche paidbah da kiwa boon ki waheh ka District nadooh ki Tymmen Wasan, ki khon ka balang, kiwa yahkhmat yong ki Bio Management Committee, ki dkhot wa kiwa da mihkhmat na ki dong ki chong waphær waphær nadooh Raliang, Biar, Mynksan, Laskein, Mowkyndeng, Mulum wa Mowtyrshiah.
Ha kani ka sngi da emlang leh u MLA ka thaaiñ, u Nujorki Sungoh.
Da pynlai ya ka yalang da u Pro. Pastor Lamjingshai O Garod.
Neiliang u Nujorki hawa e i klam da kyntu u ya kiwa chong chnong wow chimkhia ki wow pynneh pynsah ki ya ka rymaw soodong sookun. Da yoh leh i klam na ki Waheh Chnong ka Mowtyrshiah wa Mowkaiaw.
Ka sahep Lato da batai bniah ko chaphang iwa emkaam ki mrad wa im ha um wa ha ryngkaw heiwa da maitphang ko chaphang i man i long ha ki thaaiñ West wa East Jaiñtia Hills. Heijooh i por da pynche ko chaphang i kitkhlieh yong ki BMC hawa krehlang wa ki bor sorkar.
U sahep Pohsngap da klam u chaphang i wan ki mrad, ki mynsien wa ka rymaw katkam i ngait niam, da pynche u leh chaphang i batai ki bru chemphang hajrong i pynsihdur wa i chah pynjæd ya ka rymaw wa i ma wa yang nei pynjæd ya ka rymaw. Da klam u leh hajrong i kaamram yong ki bru nadooh ki bru samen hadooh i yakreh lang wow pynbha wei wow yada ya ka.
Ha kani ka sngi da yoh yei klam pdiang burom na u Rev. Arkirang Shadap katwa ya ki kyntien ekhublei da yoh na u Golden Chain Dkhar.
Da pynchohbiej ya kiwa em da i sur rwai wa myllung yong uwi na ki waheh ka thaaiñ u Tbn. Droly Lyngdoh wa ka dhab LEMACO.
Discussion about this post