Jowai: Neiliang yong ka Jaintia Students’ Union da pynsñiaw ko yei sñiawkhia yei leh yong ki bor District ka West Jaiñtia Hills wa ka Municipal Board wow beh wow khang laad ya ki wa dai madan wa chong dai mar harood sarok yong ka Iawmusiang, neibhah kani da ktah ko chiboon ya kiwa dai madan kiwa wan na ki manyung wa dooh wa duk.
Ini ym toh ka sien wa nyngkong wa da leh ya ini wei ka seiñ da jooh chong yalang ko wow thooh yutip hajrong kani wei ka seiñ da sñiaw ko katwa ym pu ye u pynbiang thaw ya kini kiwa chong dai madan da kamwi ym toh u beh ki.
“I sñiaw i wa da man ko pyrchah ya ka hok man bru yong ki wei da man ko kawa phylla wa ki bor District da leh ki ya kani, katwa ki khlem da kyruiñ won ki cha i chna ya ka Iawmusiang Market Complex ha Iawmusiang kawa da sahteiñ kattu da boon boon snem wei neiyi i daw won da beh syndet ya kiwa chongdai madan,” da ong u President ka JSU u Lawyerson War.
Kamtæ ka seiñ ka kyrpaad ko ya ki bor wa hajrong wa ya ka JHADC wow pyndep noh wow chna ya ka Complex khnang wa ki warep wa kiwa mylla sngi na kylleiñ ka ri-loom Jaiñtia u yoh myntoi ki.
Ha i jooh i por ka seiñ da kyrpaad ko ya ki bor District wow thooh thaw khnang wa kini kiwa chongdai madan u yoh thaw ki wei da pyrchah joor ko yei thmu wow beh ya ki ha ka sngi yaaw Khyllaw wa ha sngi yaaw Musiang, ki ar sngi wa na kylleiñ ka ri-loom Khasi wa ri-loom Jaiñtia da wanrah ki ya ki mar rep yong ki kawa da pynman kam wow pynchitom ya ki wei wow pyndooh noh yei hok yong ki.
Ka seiñ da pynkut ko deiwa ong wa na ki por cha ki por ka sorkar jylla klam ko wow pynku ya ka rep ka riang tangwa lada tang i thaw chong dai ym yoh ki da man ko kawa sepia.
Discussion about this post