Shillong: Ka People’s Democratic Front (PDF) ynnin i janmiet ka 20 tarik da pyntip ko wa da khut ko wow yaklam mar khmat wa ki le ngut ki MDC yong ka kiwa da e ya i kyrchaan ya ka Khasi Hills Democratic Alliance (KHDA) kawa da yahkhmat da u HS Shylla ha Khasi Hills Autonomous District Council (KHADC).
Kam wow pynkynmoo wa kini ki 3 ngut ki MDC na ka PDF, 5 na ka UDP, 4 ngut ki MDC ka NPP, 3 na ka HSPDP, u wi na ka KHNAM wa uwi u MDC samen da chna ki ya ka KHDA wow pynhaap ya ka Executive Committee warim ka PDA wa yahkhamt da u Pynshngain N Syiem kam u CEM.
Neiliang u President ka PDF u Ivanlumlang Marbaniang da ong u, “Ka PDF em ko 11 ngut ki MDC tangwa ki 3 ngut ki MDC, u James Sylliang na Mawhati Constituency, u Blanding Warjri na Mawthadraishan Constituency wa u Latiplang Kharkongor na Nongthymmai Constituency da lai ki wow kyrchaan ya ka KHDA wa yahkhmat da ka NPP. Kamtæ neiliang ka Party da khut ko wow pynman ya ka yakang wa jhan ynnin i janmiet”.
Ka Party da khut yaklam ko ya kini ki le ngut ki MDC wei da e kti ya kani ka kaam ha ki soo ngut ki MLA ka Party u Hamlet Dohling, u Banteidor Lyngdoh, u Jason Mawlong wa u Gavin M Mylliemngap, tangwa ki MDC ym em e ktien ki hadooh katni.
Kini ki le ngut da paan por ki wei da pyntip ki wa dadep ki u kular wow kyrchaan ya ka KHDA.
Heiyatoh won wa i ran dien u Morningstar Mawsor wow yakhun ya ka kaam Deputy Chairman ka KHADC, da pyntip wa da haap dam noh u neidaw wa ki le ngut ki MDC ym kyrchaan ki wei da phah chithi ya ki wow wan kyrchaan ki ya u Mawsor, kamtæ da phah ya ka Central Working Committee ka PDF wow e kti cha ka Disciplinary Committee wa yahkhmat da u MLA ka Sohra u Gavin M Mylliemngap kam u Chairman wow yaklam hajrong kani ka kaam.
Da phah ya kini ki le ngut ki MDC wow wan ki hakhmat ka Disciplinary Committee ka Party ha kani ka 23 tarik yow chim ya ka rai.
Discussion about this post