Shillong: Dei sñiawkhia hajrong i chim kabu ki kari na ka jylla Assam wow wan kamai kit moochuni ha ki thaaiñ Majai wa Ichamati, ka Hynñiewtrep Youths’ Council (HYC), ha i yahkhmat u Roy Kupar Synrem, General Secretary, da lai yachem ki ya u Neil Antonio War, Executive Member ka Khasi Hill Autonomous District Council (KHADC) wa pait ya ka tnat khayi (Trade) wow tuklar ya kani ka kaam.
“Ka Majai toh ka thaw kawa heh bha wow khayi ya u moochuni cha Bangladesh”, da ong u General Secretary wei da pynrap u deiwa ong wa katkam i chem yong ka seiñ wa hadien wa wan sylli ko ya ka thaaiñ Majai neidaw wa ood kiwa chong chnong ka thaiñ hi kiwa da pyntip wa em da ki spah tylli ki kari kiwa em ya u number Assam da wan ki wow chalan moochuni cha Bangladesh.
“Kamwa tip i wa ka KHADC da chna ko ya ka aiñ ‘Trading by non-tribals’ wei da booh ya ki kyndon wa toh u yoh ki ya ka ‘Transport Service’ kawa ong wa uwon uwon u baar jylla uwa kwah wow kamai hapoh u pood u ang kawa haap hapoh ka KHADC toh u yoh ki ya ka Trading License na ka District Council,” da ong u Synrem.
Uni uwa yahkhmat ka HYC da pynsñiaw u yei phylla wa kini ki kari kiwa kamai ha Majai ym em ki ya ki kot ki sla iwa da tyngkheiñ ya ka aiñ ka District Council.
Ka seiñ da kyntu ko ya u Executive Member wow phah ya ki pulit ka Enforcement Wing smat katwa ye wei lada chem ya ki kari wa khlem ki kot ki sla yow pynchitom ya ki katkam ka aiñ.
Ka seiñ da pyntip ko leh wa neiliang u EM da ong u wa ka District Council ym biang ko ya ki bru wei da em ko du 20-30 ngut ki pulit Enforcement wei ym ye u phah ki kylleiñ wow sylli ki ya ki Trading namo ki Labour License, kamtæ ka seiñ da kyntu ko ya ka District Council wow booh da ki Check Gate wow pait bniah ya ini waroh.
Neiliang u EM da kular u wow leh ya ini waroh.
Ka seiñ leh da kyntu ko ya ka Majai Exporters Association wow chimkhia ya ini i kaam.
Khaddooh ka seiñ da ong ko wa ini i leh ka KHADC da pynchlur ko ya ki baar jylla wow chim kabu wow wan khayi ki katwa ngait cha kani ka thaaiñ.
Discussion about this post