Jowai: Ka Jaiñtia Hills Autonomous District Council (JHADC) haka dorbar lyiur wa da pynman ynne ka sngi da pdiang ko wow pynku ya ka tulop ki MDC lyngba ka bill wa da wanrah hapoh ka yung dorbar da u Dy. CEM, u ma Lamdibok Sumer ya kawa da tip kam ka “The Jaiñtia Hills Autonomous District Council Chairman’s and Executive Members (Salaries and Allowances) (Sixth Amendment) Bill, 2018.
Lyngba ini i pynku tulop thymme, ha ka chibnai ka tulop neibynta u CEM u man ko 1,60,500, u Dy.CEM 1,57,500, u Chairman 1,57,500, u Dy. Chairman 1,54,500 ki Executive Member 1,54,500, kiwi won ki MDC 1,10,000 katwa u Leader of Opposition namo uwa yahkhmat ya ka liang pyrchah won u yoh u 1,39, 500.
Lada phiah waroh ka tulop u MDC ha ka chi bnai lyngba kani ka aiñ, ya ka tulop bnai namo Salary uwi u MDC da pynku na ka T. 8,800 cha ka T. 50,000 chi bnai, ka TA namo ka bai lai bai wan na ka T. 6,600 cha ka T. 10000; ya ka bai phah chithi, ka bill phone wa kotkhubor na ka T. 2,200 cha ka T. 2,500; ka bai dawai namo Medical Allowance na ka T. 2,200 cha ka T. 5,000; ka bai yung wai namo House Rent na ka T. 6,600 cha ka T. 12,500, ka bai lut ha Constituency namo ka Constituency Allowance na ka T. 7,700 cha ka T. 10,000; wei da wanrah thymme ya ka Menial Allowance kawa T. 20,000 chi bnai.
I pynku ya ka tulop neibynta ka chuki CEM ha kani ka kynti toh ka sien wa ynñiaw, ka bai baam tymmen namo ka Pension toh ka sien wa soo katwa neibynta ka chuki Chairman toh kawa ynru.
Ya ka Pension ki MDC da tyrwa wow pynku ya ka na ka T. 5,000 cha ka T. 15,000 neibynta kiwa man MDC chi samoi (san snem); kiwa man MDC ar samoi u man ko T. 20,000; le samoi T. 25,000; soo samoi T. 30,000; wei daw su leh ya ka Medical Allowance wa T. 5,000 chi bnai.
Kani ka Bill ka JHADC ynne ka sngi u krehkaam ko du hadien wa da pdiang u Lat ka jylla ya ka.
Discussion about this post