Jowai: Ynne da pynmih ya ka National Register of Citizens (NRC) Draft List yong ka jylla Assam wei heiyatoh wa ini u Home Minister ka ri, u Rajnath Singh da ong u wa kani man ko dang du ka Draft wei ymtoh ka Final NRC namo ka NRC wa pura.
Da ong u wa waroh i kam namo wow boh u pyrchah (Claims / Objections) ye u leh aktkam ki kyndon aiñ wei wei yeini daw chong bichaar chwa wow pynmih ya ka Final NRC.
Da ong u leh wa em ki bru kiwa kwah u chim kabu deiwa pynhær ya ka la-ær tieñsar tangwa ym emkaam wow man ki kiwa tieñ neibhah ya ka NRC da pynkhreh salonsar khlem ñiaw chiliang. Da pynrap u leh deiwa ong wa em ki bru kiwa ymye u pynbiang ya ki kot ki sla wa biang wei daw elaad ya ki wow kam namo wow kyntait ki ya iwon iwon.
“Kwah O’u pynche wa ha ka Final NRC, waroh ki bru u yoh ki ka laad wow ujor namo wow paan yarap lyngba ka Foreigners Tribunal,” da ong u Rajnath.
Ini mut i wa lada em ki bru kiwa ym em mih pyrtuid ha ka Final NRC, daw yoh laad ki wow lai cha kani ka Tribunal.
Da pynkut u deiwa ong wa ya ka NRC da pynkhreh salonsar khlem pait chiliang wei yeini leh da pait bniah da ka yung bichaar wa khlieh dooh ka ri, ka Supreme Court.
Kam wow pyntip heini wa waroh kiwa pyndap pyrtuid ha ka NRC da em ki hadooh 3.29 klur ngut wei na kini 2.89 klur ngut toh kiwa man tre ri, iwa mut da chah kyntait hadooh 40.07 lak ngut kiwa ymtoh ki tre ri ha Assam.
Discussion about this post