Ha ka 4 wa 5 tarik ka Behdieñkhlam ka Raij Muthlong

Jowai: Kamwa jooh leh khlieh snem, ka lehniam Behdieñkhlam yong ka Raij Muthlong ha uni u snem u sdang ko nadooh ka 4 tarik hadooh 5 tarik uni u Naisaphra wow man ha Syiem Biar Nohrong ka Raij Muthlong ha Thadmuthlong.

Kani ka lehniam da pyndep hadien wa ki khon ka Raij da dep thung dep bet ki ya u symbe u phniang u kba u khoo ha ki hali.

Ka Raij u pyndep ko ya kani ka lehniam deiwa sdang chwa da ka Sang Sngi ‘Shain’ kawa man ka lehniam neibynta wow kyrpaad ya u Tre Kirot wow beh ya ka kjut ka chitom.

Ya ka lehniam daw pyndep ha waroh soo tylli  ki phang – Mihsngi, Sepsngi, Cheitai wa Cheini; wei ka lehniam ‘Wator Symbei’ neibynta wow bha u miat u kba u khoo, daw em ka lehniam wa tip kam ka lehniam ‘Chawah – Chaneiñ’ iwa mut wow khanglaad ya ka kjut ka chitom wow wan chapoh chnong poh thaw.

Related posts

Da rah tarik ya ka General Meeting ka Kur Sana kawa daw pynman ha Jowai

May 7, 2025

Ym chah ya kiwa wan dai baam ha ka Chaad Sukra ka Seiñraij Chnong Tuber Kmaichnong

May 3, 2025

Haka 4 tarik won daw em ka chaad ‘Talawiar Chnong’ iwa mut wow e ngooh e dem ha waroh ki dong , wow kitbok kitrwiang ya ka chnong ka thaw waroh, katwa ha ka sngi khaddooh won, ha ka 5 tarik daw em ka ‘Sang Sngi Khlam’ iwa mut wow pynkhlaad ya ka kjut khlam, wei ya kani ka lehniam u pyndep da u Chutia ka Raij heipor step synyaw, neitæ heipor 1:30 waje nohchariñ ka sngi u pynpoi ya ki rong ha Syiem Biar Nohrong wow ya chaad lang waroh ki khon ki hajar ka Raij Muthlong wa ki khon hajar ka jaitbru Ynñiawtrep wei wow noh leh ya ki rong.

Heiyatoh wa kani ka lehniam Behdieñkhlam ka Raij Muthlong da khut ya waroh ki khon ka Seng Khasi Seiñ Raij wow wan sakhi ya kani ka lehniam wow pynman ya ka kawa chongchit wa kawa ckhongkun.

Neiliang kiwa kitkaam ka Seiñ Raij Muthlong da maham ki leh wa ym chah ya kiwon kiwon ki bru kiwa na baar namo na tre chnong wow dai ki ya kiwon kiwon ki mar pynmuaid, wa kiwi kiwi.