Chem ka KHADC wa siam thlu ka AMD ha thaaiñ SWKH toh hadien wa yoh NOC na u Sordar ka Mawthabah

Shillong: U Executive Member wa pait ya ka khyndaw ka chyiap ha Khasi Hills Autonomous District Council (KHADC), u Latiplang Kharkongor da khut u ya ki heh ka Atomic Minerals Directorate (AMD) yow paan pynche hajrong i lai siam thlu ha ki thaw wa em u marpoh khyndaw Uranium, ha ka thaaiñ South West Khasi Hills kawa dang haap hapoh i pait ka KHADC.

Ha ini i paan pynche wa neiwon yoh bor ka AMD wow lai siam thlu ko ha ka thaaiñ Mawthabah, u Latiplang da chem u wa da yoh NOC na u sordar ka chnong Mawthabah wow siam thlu ha katai ka thaaiñ wa em Uranium.

Heiyatoh wa ini i e NOC u sordar ka chnong Mawthabah, neiliang u Kharkongor da ong wa daw phah hajir u yow paan pynche leh na u sordar wei lada chem wa bakla u, ka KHADC daw pynchitom ko ya oo, wot hadooh wow pyndam noh ya ka sanat man sordar u.

“Kammon u sordar ye u e bor samen ya kani ka kaam?” da kylli u EM ka KHADC.

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Katkam ka No Objection Certificate (NOC) wa da soi ha ka 4 tarik Naitung (April) uni u snem da thoh “Nga u sordar ka chnong Mawthabah nga kyrchaan O yei tih wei yei thooh bniah ya u Uranium da ka Atomic Minerals Directorate, wei mynjur wow e ki thaw wow siam thlu ka AMD wei kamjooh u e yarap yow leh ya ini waroh.”

Ki heh ka AMD da ong ki wa katkam ka Atomic Energy Act 1962, ka e laad ko ya ka AMD wow kreh ya kiwon kiwon ki kaam ha waroh kawi ka ri India du neiwa yoh bor na ki tre thaw wei deiwa pyntip cha ki Chief Secretary ki jylla wa krehkaam ka AMD.

“Lada pyntip cheiwon cheiwon leh ka KHADC ym pdiang, wot la toh u Chief Secretary neibhah katai ka thaw dang haap ko hei pait ka council,” da ong u Kharkongor.

U Kharkongor da pyntip u wa ki heh ka AMD wa kynthup ya u Regional Director u Sandeep Hamilton wa u Deputy Regional Director u Dr. Rahul Banerjee da ong ki wa i lai yong ki toh hadien i yoh ya ka NOC na u sordar chnong ka Mawthabah neibhah ym tip ki wa emkaam u yohbor na ka KHADC.

U Latiphlang da ong u, “Nga da ban joor O wa ka AMD toh u sangeh ko chi syndon yei lai cha ki thaaiñ wa em Uranium wei lada emkaam iyi iyi toh u lai ki lyngba ka KHADC,” wei da pyntip u leh wa ka AMD da mynjur ko wow sangeh wow leh kawon kawon ka kaam ha ka thaaiñ wa em u Uranium.

Neiliang ki heh ka AMD da sait kti ki wa ym em yatoh ki iyi iyi leh wow tih ya u Uranium namo waka UCIL wei i leh yong ki toh du wow siam thlu ha South West Khasi Hills toh i bynta wow thooh bniah wei wow puræ.

Hajrong ini i kam ki heh ka AMD, u Kharkongor da ong u wa ka AMD waka UCIL ym em yaphær ki neibhah ya ka Contract (Tender) da khut da ka AMD ya ka UCIL wow tih Uranium.