Jowai: Ka Meghalaya Public Service Commission (MPSC) da chimkhia ko wa ka Part A-Preliminary Examination neibynta ki kreh Meghalaya Civil Service (Junior Grade) u man ko kawa khooid wa kawa lai bait.
Ya ka Preliminary Examinations da pynman ya ka ha ki ar thaw næ Centre hapoh jylla wa kynthup ya ka Shillong, East Khasi Hills wa Tura, West Garo Hills ynne ka 4 tarik heiwa da em 14 tylli ki Examination Centre ha Shillong katwa 6 tylli won ha Tura.
Hawa pyntip ya ki kaam ka Commission wow pynman exam, ka Secretary ka MPSC ka W.M. Booth da ong ko wa ha ka sien wa nyngkong wa ki magistrate u man ki kam ki supervisor wei wow kreh neibynta wow pynneh yei suk i saiñ ha ki Examination Centre heiwa da esikai ya ki magistrate wow tip ki yei kaamram yong ki.
Da pyntip ko leh wa ki Deputy Commissioners yong kini ki ar district da pdiang ki wow phah ya kiwa riñ dur namo ki Videographer wow riñ video ya ki exam.
Ka sorkar da rai ko leh wow thung ya ki observer ki wow pyntikna wa ki exam man ki kiwa khooid wa kawa lai bait.
Ya ki candidate wa thoh exam da sylli ya ki chwa wow psiah ha ki exam hall wei ym chah ya ki candidate u psih ki hadien chiteiñ kynta nadooh wa sdang i por exam.
Ha kani ka exam ym chah wow rah calculator, mobile phone wa kiwi kiwi ki tiar wei lada chem ya kiwa rah daw khang ya ki wow thoh ya ka exam.
Da pyntip leh wa ha kani ka exam da em palat 10,000 ngut ki candidate wei u em leh 46 ngut ki People with Disabilities namo kiwa em i duna ha i doh i pran.
Discussion about this post