Shillong: Ka sorkar jylla da chim ko ka rai wow booh pood ya i rukom pynlut wow thied ya ki kari sorkar nadooh ka kyrdan u Montri Rangbah, u Lat ka jylla, ki Montri sorkar hadooh ki sahep waphær waphær ka jylla.
Hawa yaklam wa kiwa pathai khubor hadien ka yalang ka dhab ki montri ynne ka sngi, u Prestone Tynsong da pyntip u wa i yoh u Montri Rangbah wa u Lat ka jylla neibynta ka kari da booh pood hadooh T. 40 Lak, neibynta u Symbood Montri Rangbah, ki Montri ha ka sorkar wa u Chief Secretary da booh hadooh T. 20 Lak, ki Additional Secretary wa DGP hadooh T. 12 Lak. ki Commissioner Secretary hadooh T. 10 Lak, ki Secretary, DC wa IGP hadooh T. 9 Lak, ki sahep wa pait ya ki district hadooh T. 7.5 Lak wa kiwi ki sahep wa dang khian won T. 7 Lak.
“Ha ki por wa dadep da pynlut neibynta wow thied ya ki kari wa pynemkaam da u Montri Rangbah wa u Lat ka jylla ym jooh em iwon iwon i booh pood wei ye ki u pynlut wot da ki klur,” da ong u Prestone.
Chooh chooh da ong wa ka sorkar katni da chim ko ka rai wow booh pood yei rukom thied kari ki heh ki haaiñ ka sorkar.
“Kattu u Montri Rangbah wa u Lat ka jylla pynlut ko neibynta wow thied ya ki kari wow pynemkaam ha ki kaam u man ko hadooh T.40 Lak, katwa u Symbood Montri Rangbah, ki Montri Sorkar wa u Chief Secretary i pynlut neibynta wow thied kari u man ko hadooh T.20 Lak, ini i booh pood u man i leh ya ka sahep sorkar waphær waphær ha ka jylla,” da pyntip u Prestone.
Discussion about this post