Jowai: Ynne ka Sngi ka Khasi Students Union Jaiñtia Hills District Unit (KSU-JHDU) da lai ko wow pynkha sa ya kawi ka tnat krehkaam ka yong ka ha ka chnong Thadsning, West Jaiñtia Hills District.
Ya ka yalang wow pynshkem ya kani Unit da pynlai da u Leningrad Tariang Organising Secy. ka KSU-JHDU. Katwa ya i pynsmai da chimkti da u Ohibait Dkhar, President ka KSU-JHDU.
U Ohibait hawa e ya i klam da ong u wa ka KSU chimkhia bha ko heiyatoh wa i yoh psiah laitlaan ki myndær chapoh ka Bri U Ynñiawtrep khamtam katni wa da pynmih ya ka Final Draft yong ka NRC hapoh ka jylla Assam. “Neini i daw ha kini ki tayaw wa da dep da pynyieñ i da ki Infiltration Check Gate yong ka seiñ ha kylleiñ ki thaw Khappood wa ka Assam,” da ong u Ohibait.
“Ini i lai pynyieñ Infiltation Check Gate ym em man ko kawa sepai neibhah da yoh wow ksoh ya ki spah ngut ki myndær kiwa ym em kot em sla wow pynsakhiat wa man ki kam kit re ri India, wei katni da yoo leh wa ki pulit leh da chimkhia ki wow sylli ya ki kot ki sla kiwa wan wow psiah chapoh ka jylla.”
“Da phah i ya ki dkhot yong i wow man ki kiwa paitngor bha yei psiah i mih ki myndær ri chapoh ka bri u Ynñiawtrep.” da pynrap chooh chooh u.
Kiwi de kiwa emlang ha kani ka sngi ki toh u Shaniah Dkhar Asst. Finance Secy. ka KSU-JHDU, u Justice Paul Lyngdoh Education Secy. ka KSU-JHDU, u Garland Manner Asst. GS wa u Nangaibormi Sutnga uwa yahkhmat warim ka KSU-JHDU.
Kiwa kitkaam wa thymme ka KSU Thadsning Unit toh u Titus Sajem kam u President, u Fidalis Lamare kam u Vice President, u Don Jingkyrmen Siangshai kam u General Secy, u Evansius Siangshai kam u Asst. GS wa kamwa 11 ngut kiwi won ki dkhot wa kiwa kitkaam ha ki tnat waphær waphær.
Discussion about this post