Beiñ joor ka MPUF-EJHD ya ki damok wa thmu wow thang ya ka kari uwa kitkaam seiñbhalang

Khliehriat: Ka seiñ MPUF-EJHD (Meghalaya People’s United Front – East Jaiñtia Hills District) da dawa joor ko naka tnat pulit wow thooh wei wow kem noh ya ki damok kiwa pyrchang thang ya ka kari uwa kitkaam seiñhalang ka KSU u Shaniah Dkhar.

Da ong ko wa katkam wa chem ka seiñ, u Shaniah man u u bru uwa bha wei uwa jooh smat wow yarap ya kiwa dooh wa duk wa ka imlang sahlang wa kamjooh leh ya ki khonswet.

Chooh chooh da ong wa man u u bru uwa sñiaw khian wei lada ki pulit ka East Jaiñtia ym chemdien ki ya kini ki damok daw pynchlur ko ya kiwi wow leh kamni.

Ka East Jaiñtia man ko kawa tlot i rukom krehkaam ki pulit, wei da ong ko wa daw lai yachem noh ko ya u SP ka East Jaiñtia chirup wa ka dorkhat wow kem wei wow pynchitom ya kini ki damok, da ong u President ka seiñ u Michal Chyrmang.