Khliehriat: Ynne ka sngi da pynman ya ka Review Meeting ha East Jaiñtia Hills District heiwa da chongknor da u montri ka tnat PHE & Secretariat Administration etc. u Samlin Malngiang ha Circuit House, Khliehriat hei emlang u Deputy Commissioner, ka district, u F. M. Dopth, wa ki heh yong ki tnat sorkar hapoh ka District.
Hadien wa da pynyoo ya ka Power Point Presentation na ki tnat, u montri da pynsñiaw u yei mynsien wa kmen yeiwa da sakhi u ha kani ka yalang deiwa ong wa ka sorkar MDA phah ko ya waroh ki montri wow lai cha ki District wow booddien yei pynkrehkaam ya ki scheme wa ki project da ki tnat.
Da kyntu u ya ki sahep sorkar wow kreh neibynta i roi ka District waroh kawi deiwa ong wa ini daw yarap i wow pynmiat ya i rukom im ki bru hapoh ka District.
Chooh chooh da ong u wa ka sorkar daw pynsñiaw ko yei eh i khoo wa yachem ki tnat hapoh ka District hawa pynman yalang ka dhab ki montri sorkar.
Hachwa ini neiliang u Dopth, da e u ya ki kyntien pdiang burom deiwa kyrmen wa ki montri khynroo ka sorkar daw ye ki wow wanrah ya ki kaam pynroi hapoh East Jaiñtia Hills District.
Hawa kut ka R.S. Manner, ADC kawa man leh kam ka Project Director, DRDA da e ko ya ki kyntien e khublei.
Discussion about this post