Toh u pynkup bor chooh chooh ha u chynrang Khasi yow lait na i chongkha khleh: M. Syiem

Jowai: U Convener ka Maitshaphrang Movement, u Michael Syiem da ong u wa lada pynkupbor chooh chooh ya u chynrang Khasi ym emkaam de wow wanrah ya ka aiñ wow khang ya ki kynthai na i chongkha khleh, ka Khasi Hills Autonomous District (Khasi Social Custom of Lineage) (Second Amendment) Bill, 2018.

U Michael, da ong u hei yalap ka Maitshaphrang ya ka Meghalaya Compulsory Registration of Marriage Act ha ki 30 snem kattu, da chem wa i chongkha khleh ki kynthai Khasi toh neidaw wa boon ware kiwa kit khon khian khlem yoh yei bai baam na u kurim wa da yut khamtam kiwa wan na ki manyung wa dooh.

“Ka chongkha khleh em ko ha waroh ki jaitbru ha pyrthai, tangwa neiyi i daw wa joor i ha ka jaitbru yong i?” da kylli u.

Da ong u wa katkam ka Cencus u snem 2011 ki manyung BPL ha ka jylla em ki 68%, deiwa pynrap wa ini i chah ieh khon khian da pynsyir ko ya ki kattu katni ki kynthai Khasi wow yoh kurim da u chynrang Khasi, iwa da pynyoh laad ya ki baar jylla wow chim kabu neibhah wa yoh myntoi ki neini i yoh pateiñ ki kynthai Khasi.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

“Da sdang em ki manyung Khasi kiwa yaklam wa kopsar ka chongkha chongman dang lah da u wym toh u Khasi,” da ong u wei da pynrap leh wa da em ki kot ki sla wow pynsakhiat ya ini i kam.

Da ong chooh chooh u wa ha ka jaitbru wa chim jait naka bei yong i, ka kaam chongkha chongman leh toh u pynkhlan ya ka da ka ya thoh ya taar ka ya kular lyngba ka aiñ Compulsory Registration of Marriage Act, neibhah man ko kawa suk ya u chynrang wow mih noh na ka chongkha khlem da e bai baam wei da ngiat ya ka yukit cha ki kur ki jait ka kynthai.

“Ymye i leh wow pynbaad du ya u chynrang, neibhah ka dustur e laad ko ya ini heiwa u chynrang ym em u ka kitkhlieh hadooh wa da chim kabu u,” da ong u Syiem.

Ha iwi tawon i liang u Syiem da ong u wow yada na i chongkha khleh ki kynthai Khasi toh u pynkup bor chooh chooh ha u chynrang Khasi deiwa e ha u chynrang ya ka kitkhlieh wa i embynta lang ha i manpa u.

Da pyntip u leh wa daw phah ya ka e yumut yong oo hajrong ka ka Bill chongkha cha ka KHADC, wei da ong u leh wa ini i e yumut u toh neidaw hadooh katni ka jaitbru Khasi toh kawa da chim jait naka bei wei man ko kawa emkaam bha wow chong wow phyllu yumut bha wei kamjooh leh wow chim yeiwa da chem ka Maitshaphrang.

“Thooh chwa ya ki daw khnang wow ye u wanrah ya ki laad wow pynbha,” da ong u.