Jowai: Ynnin ka 6 tarik ka RKSK Division (Ka program neibynta u punku ya i chait i khiah ki khynnah wa dang khai khynroo) kawa em hapoh Ka National Health Mission (NHM) da pynman ko ya ka program wow pynche pynsñiawthooh ya ki khynnah wa dang khai khynroo heiyatoh i emkaam ka “Life Skills” næ ki sap wa emkaam ki u em hei rukom im khynroo yong ki khnang wow yada kamjooh wow yarap ya ki wow lait ki na kiwon kiwon ki chah pynchoi ki chah pynbor wow leh ya ki kaam kiwa ye u yah ya ki ka cha luti wa bakla kawa ye u ktah ya ka mynried yong ki.
Ha kani ka sngi ya kani ka program da pynman neibynta ki khynnah Class 11 wa Class 12 yong ka Thomas Jones Synod College wa ka Kiang Nangbah Govt. College heiwa da wan ki u ya chimbynta chong chit.
Ka Flourish Lyngdoh kawa man kam ka Program Officer RKSK da e ko ya i klam deiwa ong wa ha kani ka rta boonsien ki khynnah emkaam bha ki u yoh ya kani ka esikai, neibhah ini toh i rta wa boonsien ki khynnah kwah ki u pyrchang ya ki kaam kiwa ye u yah cha i saja ya ka mynried yong ki wei em ki por da ktah ko leh ya i chait i khiah wa ya i pyrrkhat pyrdaiñ wa i silet won hadien.
Ki maa kiwa yang lada ym pynemkaam lada ym tip ya ki Life Skills boonsien toh ngat ha ki jait dih pynmuaid, i chongkha khynnah, ki pep skur chiteiñ por, u leh ya ki kaam damok, i rieh kdong kamtæ ter ter.
Ha kani ka esikai da em leh u Kick boxer wa pawnaam ka ri-loom Jaiñtia Hameshaniah Suiam uwa man leh kam u Goodwill Ambassador ka RKSK, ki Adolescents Counsellor kiwa em ha Jowai Civil Hospital, Ummulong CHC wa ha Laskein CHC.
Ka RKSK Division, NHM lyngba ka tnat i chait i khiah da e khublei ko ya u R.R. Kharkongor wa ya u O.U. Lyngdoh, kiwa man ki principal yong ka Thomas Jones Synod College wa ka Kiang Nangbah Govt. College wa da pdiang sñiawbha ki ya kani ka program neibynta i myntoi ki khynnah puræ.
Discussion about this post