Dawa ka MCTOOA wow pyndam ya ki Weigh Bridge ki bru samen deiwa booh noh da ki Integrated Check Gate

Jowai: U President ka Meghalaya Commercial Trucks Owners and Operators Association (MCTOOA) u Taiphur Wardkhar ynne ka sngi da thoh u cha u montri rangbah ka jylla yei chah ktah kiwa yah truck neidaw wa boon ware ki Weigh Bridge hapoh ka jylla iwa da ktah ya ki truck wa kit ya ki mar wa emkaam ki paidbah man ka sngi nadooh ki jhoor ki jhep, ki dawai dachin, ki kot puræ puthi wa kiwi kiwi de.

Ka MCTOOA da ong ko wa ka tnat Transport da booh ko boon ware ki Weigh Bridge ha ki sarokbah deiwa e nongmuna wa na Jorabat hadooh Ratacherra da em hadooh san tylli ki Weigh Bridge wei ki dkhot yong ki da pynbor ya ki wow lai na kawi pa kawi wei da em leh kiwa dang chna thymme ha kiwa boon ki thaw ha ka jooh ka sarokbah.

Ka seiñ da ong ko leh wa ini da man ko kawa pyrchah ya ka Policy ka sorkar jylla heiwa ha u snem 2010 da khang ya ki bru samen wow chna wow pynyieñ ya ki Weigh Bridge wei kani ka Policy da klam che ko wow booh du ya ki “Joint and Integrated Weigh Bridge”  ki wow pynlai da ki tnat ka sorkar jylla.

Tangwa du hapoh ka jylla Meghalaya donhi da man ko ka khih ya ki bru samen kam wow pynyoo ka sorkar ya ki ya i sniawngooh wei ya kini ki bru leh da pynchlur da ka sorkar jylla wow leh ki ya kani ka kaam deiwa e nongmuna wa ka Rules of Transportation and Regulations of Weigh Bridges da wai laad ko ya uwon uwon wow tyrwa wow wai Weigh Bridge wei manda yoh License ki, ki Truck haap su ki T. 200 wei hadien ini iwa pynlang ki da ya saam lang waka sorkar kawa da e pyrtuid kam ka Annual Premium kawa da poi hadooh T. 1.5 Klur hadooh T. 2 Klur chi snem kawa man ka khih suk wa da kyrchaan leh da ka sorkar.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh ka seiñ da ong ko wa du hapoh ka jylla wa ki tre truck da haap ki u su dan heiwa i lutsan kiwa em Weigh Bridge da sai na ki kata ki tre truck iwa da ktah won ya ki paidbah neidaw wa ku dor ki mar ki mata wei ka sorkar da toh por wow pyndooh noh ko ya ki Weigh Bridge ki bru samen deiwa booh noh da ki Integrated Check Gate ki yong ka sorkar yow lait noh i chah lute ki truck khamtam ha kini ki por wa joor i ku dor i Petrol wa i Diesel.

Ki Integrated Check Gate ka sorkar kiwa pynlai da ka hi toh kiwa daw neh chi thaw ymtoh kamwa man katni kiwa kyrriah na iwi i thaw cha iwi ki yong ki bru samen wei ini ymtoh iwa eh ya ka sorkar wow leh ko.

Kamtæ ka seiñ da kyntu ko wa ka sorkar wow chimkhia noh ya ini.